July ni 31 (Ningani) khan 'Govt. Hnahthial College Freshers' Social-cum-Graduation Day' neih a ni a, Lunglei HPC Vice-Chairman Pu S.Laldingliana chu Khuallian niin he hun hi a hmanpui a ni. Khuallian hi Govt. Hnahthial College Principal Pu Vanlalhnema leh College zirtirtu leh Staff ten an lo hmuak a ni.

Govt. Hnahthial College Freshers' Social-cum-Graduation day hi Students' Union General Secretary Vanlalhmuaka-in a kaihhruai a. Graduate tharte hnena lawmpui Certificate a hlan zawhah Khuallian Pu S.Laldingliana chuan thu sawiin Hnahthial College bultantute zinga a tel thu leh he College-in kum 34 lai hmel a hmuh ta chu a lawmawm tak zet a ni, a ti. Hnahthial-in College an neih ve theih nana theihtawp lo chhuah thin a thawhpui hluite chungah pawh lawmthu a sawi a ni. Mizoram chhimlam chu thluakah a hniam ta deuh em mawni tia sawi a nih tak chu a rilru nat thlak hle a, thildang zawng zawng dah thain, zirna hi 'Number One' ah dah a ngai tawh a ni, a ti. Tunlai khawvel hun khirh takah mithiamte tan chauh hmun a awm tawhnaah Mizo thalaite pawh intuaihriam a, khawvel ruala ke pen theihna turin zirna lamah kan bei tak tak a ngai tawh a ni, a ti a. Hnahthial College-a kal zirlaite pawh hniam bika inngai lovin he College atangin thiamna tak tak an chhar theih nan theihtawpa bei theuh turin a chah a; "Mizoram hmasawnna zel turah kan zirlai thalaite in pawimawh a ni" a ti. Khuallian Pu S.Laldingliana chuan Govt. Hnahthial College hman atan Football Jersey Set 1, Football 1, Volleyball leh Net 1 a pe nghal a.

Govt. Hnahthial College Principal Pu Vanlalhnema'nan mamawh Tuizem lian (water reservoir) chungchang a thlen chu Khuallian Pu S.Laldingliana chuan nakkum HPC Budget-ah dah a ni ang tiin a chhang nghal bawk a ni.

Hemi ni vek hian Pu S.Laldingliana chuan Tuipui 'D'-a HPC suma playground siam mek a tlawh nghal a, Tuipui 'D' VCP leh khawtlang hruaituten an lo hmuak a ni. HPC Vice-Chairman hian Tuipui 'D' Lei sak mek pawh a hmunah a tlawh nghal bawk a ni. Tuipui 'D' khawtlang tan Footbal 1 leh Volleyball + Net 1 ve ve a pe bawk.

Hnahthial leh Tuipui'D' a tlawhnaah Lunglei HPC Vice-Chairman Pu S.Laldingliana hi a nupui Pi Lilypari Sailo, ARCS; Lunglei District IPRO Pi Mina Zoliani; MJA Lunglei President Pu K.Lalrinpuia leh Executive Member Pu H.Lalthansanga ten an tawiawm a ni.