Vawiin chawhnu khan Home Minister Pu R. Lalzirliana chuan a chenna in Armed Veng-ah Press Conference neiin thuthar lakhawmtute hmaah tunhnaia Aizawl khawpui hmun hnih - Bungkawn leh Mission Veng a bomb tipuaktu Lalringthanga chu tukin zing khan Vairengte-ah Mizoram Police ten an man thu a puang. Press Conference-ah hian Home Minister hi PHE Minister Pu Zodintluanga; IGP Pu Zorammawia IPS; Aizawl SP Pu C. Laldina, IPS leh SP CID (Special Branch) Pu Rodingliana Chawngthu ten an tawiawm a ni.

Home Minister Pu R. Lalzirliana chuan Aizawl khawpui chhunga tum ruk lai misual midawizep ten remna leh muanna tih bahlah tumin Sawrkar leh mipui te an tih thaih a, bomb an ti puak a, hetiang titu te hi Police ten ngawrh taka an zawn laiin tunhnaia Sangai Express-ah HPC(D) inti ten an tih anih tih an rawn puang a, a runthlak khawp mai a. Police te chuan hun rei taka atang khan rinhlelh neiin pawikhawitute man tumin theihtawp an chhuah a, hemi thu an rawn puan hnu phei chuan ngawrh leh zualin misual te hi man tumin hma an la a. An thudawn bawhzuiin Mizoram Police chuan tukin zing dar 5:00 AM khan H. Lalringthanga kum 45 Mualtluang, Diphuchhera, Cachar District, Assam a cheng inti chu Vairengte ah an man a ni, a ti. Aizawl khawpui hmun hnih – Mission Veng leh Bungkawn a bomb tipuaktu chu amah ngei a ni tih Police hmaah a in puang a, nimin piaha Police ten an man H. D. Lalhmangaiha, HPC(D) lam tang ina a tih tir anih thu a puang tel bawk a ni.

Home Minister chuan Mizoram Police ten theihtawp chhuaha pawikhawihtu an man chu lawmawm tiin an inpekna chu fakawm a ti a. State ralmuang berah mipuite hlim taka kan awm laia a hetiang ti duh tu, tualthah tumtu leh hnam tih chiai tumtu man chhuah an ni chu lawmawm a tih thu a sawi. Home Minister hian Press Conference-ah thuthar lakhawmtuten zawhna an neih te a chhang bawk a ni.