Himalayan Institute Hospital Trust, Dehra Dun, chuan an Institute dintu Dr. Swami Rama hming chawiin Swami Rama Humanitarian Award for 2013 dawng tur a zawng mek a. He lawmman dawng tlaka ngaih mi hmingtha / institution hming thehluh hun hawn mek a ni.

He lawmman dawng tura hming/ institutions rawt theihte chu tun kum sawm kalta chhunga ram leh khawtlang tana hnathawktu mi hmingtha; heng ei leh bar hmasawnna lamte, thing leh mau humhalhna lama thawhhlawkte, thiamna lama mi chung chuangte, vantlang leh sakhaw rawngbawlna lama mipuite tana fak tlaka hna lo thawktute an ni tur a ni a. Kum sawm kalta piah lama thawktu an hnathawh tunlai thlenga mipuite tana chhawr tlak emaw a rah seng mek te pawh thehluh theih a ni bawk.

Hei bakah hian khawtlang nun siamthatna hnate, ram inrelbawlna lama hmasawnna tur kawngte, mi hnuaihnung zawkte an lo dinchhuah theihna tura mahni inphata thawktute, ram leh hnam inpumkhatna kawnga thawktu tu pawh, sawrkar hnathawk leh thawk lemlo te pawh he Award dawng thei tura rawt (recommend) theih an ni.

He Award hian Thuchei chi hnih leh pawisa fai cheng nuai nga (Rs.500000) a keng tel a, a dawngtu tur hi, dawng thei tura rawt te zing a tangin, Shri M.N Venkatachaliah, Chief Justice hlui kaihhruaina a la thlan chhuah leh tur a ni.

Hrechiang duh emaw rawtna neite chuan District tina Deputy Commissioner te hnenah July, 2013 chhunga zawh fiah theih a ni.