Ni 19 July, 2013 (Inrinni) khan Government Saitual College chuan an College Jubilee Hall-ah Zirlai lut tharte lawmna leh zirlai hlawhtlingte thlahna hun an hmang a, bialtu MLA, Home Minister Pu. R. Lalzirliana chu khuallian a ni.

Zirlai naupangte leh an nu leh pa kal khawmte hmaah thu sawiin khuallian chuan India ram economy thang chak takah hian zirlaite chu nakin lawka min kaihruaitu tur leh hmun pawimawh tinreng la luahtu turte an nih avangin hman tlak leh chhawr tlaka inzir reng a tul tak zet a ni a ti a. Mahni inthunun thei mi, tum fel tak nei leh chu lam pana taima taka zir tlat mi ni tura fuihin chutih ruala kan hnam nun ze mawi, aia upa zah thiamnate, tlawmngaihnate leh nu leh pa thuawihna nunmawite hloh zawnga kan inzir chhuah a hlauhawm hle thung a ni, a ti a. Mithiam leh mifing kan tihte hi lehkha chhiar tam leh chhiar zau an nih thin thu sawiin khuallian chuan zirlaite chu lehkha chhiar uar tura fuihin, Library chu tangkai taka hmang tur te, saptawng leh Hindi thiam tum ngei tur tein a chah bawk.

Khuallian Pu. R. Lalzirliana hian kumin Mizoram University result-a Government Saitual College atanga exam beitu zirlai hlawhtling mi 41 te hnenah leh zirna tluang pangai baka intuaihriamna dang ( Career Oriented Course), College in a kalpuia tha taka zirchhuak mi 24 te hnenah lawmpuina certificate a hlan bawk a. Tin, College ruhrel (infrastructure) sak mekte pawh a hmunah en puiin hmasawnna chak taka kalpui a ni chu lawmawm a tih thu a sawi a ni.

He inkhawm hi Dr. Lalsiamhnuna, Principal, Government Saitual College chuan kaihruaiin, Pu R. Lalruatkima, Secretary, Academic and Moderation Committee chuan report a pe a. Report-a tar lan danin kumin hian zirlai hlawhtling mi 41 awm in, an zinga mi English Subject zirlai Lalduhsaka chu Mizoram University examah hian pathumna a ni nghe nghe a. zirlai inziaklut thar mi 190 an awm mek bawk. Subject hrang hrang pasariha zir theih meka hei bakah hian College hian University Grant Commission bul tumin zirlaite tuaihriamna dang (Career Oriented Course) heng; Spoken English, Spoken Hindi leh Computer Application ah te fel fai takin an kal pui bawk. Tun dinhmunah Government Saitual College ah hian thawktu mi 45 an awm mek a ni. Zirlai thar lawmluhna leh hlawhtlingte thlahna hi ruai nen ropui takin an lawm a ni.