Vawiin khan Kelsih Sunday School Hall-ah ‘Awareness Campaign-cum-Farmers Training on Oil Palm Cultivation’ neih a ni. He hun Pu H. Thankhuma, DAO, Aizawl District kaihhruaiah hian Dr. C. Lalzarliana, Director of Agriculture (Crop Husbandry) chu khuallian a ni a, Pu K.S. Thanga, Parliamentary Secretary, Agriculture Department chuan a hmanpui.

Khuallian Dr. C. Lalzarliana chuan Mizoram hi thlai tinreng that theihna hmun, Israel ram, thlaler ram ro aia intodelh thei tur kan nih thu sawiin Pathian ringtute tihawm renga mawia taima taka hna kan thawh chuan rei loteah kan intodelh thei a ni tiin vai sumdawng vak vel, market mumal lo kuta innghat lova, market nei saa kan innghah a hun tawh tak zet a ni a ti.

Training hmanpuitu Pu K.S.Thanga, Parliamentary Secretary chuan “Zoram mipuite hian Party ruihchilh mai lova Development Revival beihpui thlak hi kan tih tur a ni. Kan intih kohhran mi-na ringawt ai hian intodelh tura kuthnathawh nasat a tul a, Samdal Thatchhiaa policy ang maia a vantla ring mai lo a, beka thlantui luanga hmasawnna hi a hluin a ngelnghet a, a man a tam a ni” tiin kalkhawmte a fuih.

Pu Tlangtimawia Zote, Insecticide Analyst chuan loneitu kalkhawm mi 91 zet te chu Power Point hmangin Oil Palm chin dan chipchiar takin a zirtir a. Pu Hriatpuia te nupa chuan an tawn hriat atanga Oil Palm chin hlawk dan te, kuthnathawktute tana intodelhna kawnga thlai chin hlawk ber a nihzia leh ram leilung humhalhna tha tak a nih thu an sawi lang a, a hralhna awmsa Zoram kuthnathawktute tana thlai chin manhla tak a nih thu kalkhawmte an hrilh bawk a ni.