Tanhril Branch YMA chuan vawiin khan awmni khamin an branch kum 75 tlin an lawm a; Tanhril Community Hall-a inkhawm buatsaihah hian Parliamentary Secretary Pu Lal Thanzara chu khuallian a ni a. Pu Chalchhunga, Mission Vengthlang, kum 1937-a Tanhril Branch, Young Lushai Association (YLA) din tirha Asst. Secretary hmasa ber chu khual-zahawm a ni. Khuallian hian Platinum Jubilee lungphun chu inkhawm tan hmain a hawng a ni. Pu Lal Thanzara chuan, “YMA hi party leh kohhran awm lova Mizo zawng zawng min phuarkhawmtu a nih avangin kan hnam tan a vanneihthlak hle a. YMA hi sawrkar khalh ngiltu, ei leh bara kan intodelh theihna tura sulsutu, ram leh hnam humhalhna kawngah te, ruihhlo dona kawngah te, ruihhlongaite chhanchhuahna kawngahte kan ram hmachhuan ber a ni a. Kristian nun dan tha ngaihsan thupui pakhata neitu a nih avangin YMA hian malsawmna pawh a dawng zel dawn a ni” a ti.

Pu Lal Thanzara chuan YMA member-te chu taimakna kawngah an puanven sawi chhing tura fuihin, “Kan ramah ram dang miten nupui fanau chawmna tur hna thawh tur an hmuh laiin, Mizo thalaite zingah hna thawh tur hre lo leh thawh hreh ngah lutuk avanga nu leh pate thawhchhuah ring kan tam lutuk hi inenlet a tul a. Taimakna hi ram leh hnam humhalhna hmanraw pakhat a ni” a ti bawk. Hnam dang pasala neih chungchangah pawh Pu Lal Thanzara chuan thil thui tak thlir thiam turin YMA member-te chu a chah a. “Bible chuan kan nupui-pasal tur awm mi ngun taka zawng tura min tih laiin, nawmsak kan duh luatah kan thlahte tisa leh thlarau dinhmun tur ngaihtuah chang lo leka hnam dang neih kan hreh ta lo hi a pawi em em a ni” a ti.

Zu chungchangah Pu Lal Thanzara chuan a ngaihdan sawiin, “Kristian kan nihna angin zu hi thil tha lo a ni a; nimahsela, zu kan khap bur chung pawh hian zu a tam em em tho a, a tam em em rualin zu in duhte tan zu tha hmuh mai a harsat bawk si avangin thalai tam takte zu chhia avangin kan chan mek a ni” a ti a. Zu chu khap hneh rual loh a nih si chuan a khuahkhirhna dan ennawn chu thil tul tak nia a ngaih thu pawh sawiin, “Kohhran hruaitute pawh zu khapna chungchangah hian ngaihtuahna thar seng turin ka ngenin, ka sawm duh a ni” a ti bawk. Assam nena ramri buai chungchang Pu Lal Thanzara chuan, “ramri chungchanga buaina hi YMA, MZP leh party mal anga hawhawa nawr fel chi a ni lova; Mizoram leh Assam sawrkarin dawhkan kila kan sawi a ngai a, chutah chuan inremna kan nei thei lo a nih chuan Central sawrkarah kan zualko tur a ni zawk” Pu Lal Thanzara chuan a ti. Tanhril Branch YMA hian Platinum Jubilee hi kumin June thla atang khan intihsiakna leh kawng chi hrang hrang dangin an lo lawm tan tawh a; vawiin hian khawtlangin ruai an kil a ni. Tanhril khawtlang tangrualin an lo ngenna angin Pu Lal Thanzara chuan Tanhril khaw luh chhohna kawngpui leh khawchhung kawng dangte siamthatna atan PWD kaltlangin cheng nuai 20 pek an nih thu a puang a; Mizoram University leh tanhril inkalpawhna tur kawng pawh kumin chhunga kut thlak a nih tur thu a puang bawk.

Tanhril Branch YMA chuan vawiina an Khual-zahawm Pu Chalchhunga chu kum 90 ral a kai hnu pawha thiamhnang deh hmanga mahni la intodelh thei, mi taima leh chhuanawm chungchuang a nih avangin Padma Shree dawng tura recommend tura an duhsakna ziakin Pu Lal Thanzara hnenah hian an hlan a ni. Platinum Jubilee lawmna inkhawmah hian Jubilee Zaipawl bakah Tanhril khaw chhunga kohhran hrang hrang zaipawlte an zai a; Jubilee puala Souvenir buatsaih chu tlangzarh a ni bawk. Zan lamah vantlang inkhawm buatsaihin, he Platinum Jubilee lawmna hi khar a ni ang.