North Eastern Region Urban Development Programme (NERUDP) State Steering Committee vawi 9-na chu vawiin chawhnu dar 2:00 khan Chief Secretary Conference Hall ah an Chairman Pi L.Tochhong, IAS Chief Secretary hovin an thukhawm a, Ministry of Urban Development-in hmarchhak State khawpui te tihchangtlun nana Asian Development Bank atanga Loan a puk hmanga Aizawl khawpui cheithat leh siam changtlun nana hmalak dan tur kawng hrang hrang an rel ho. Kum 7 chhunga (2009-2015) hmarchhak state khawpui 5 te tihchangtlun nan hian sum Rs 1300 crores ruahman a ni a, he programme hnuaiah hian tui in tur hnianghnar taka pek chungchang te, bawlhhlawh leh tui chhe thli leh inthiarna thianghlim leh tha zawk ruahman te a huam a ni.

Vawiin meeting ah hian Project-I hnuaia tui in tur (water supply) lama hmalakna te, tuizem lian siam hna te, Tuikhuahtlang leh Chanmari Booster Pump House-a Chlorinator bun fel a nih tawh thu te, Tui Meter 15,000 vuah fel a nih tawh thu te sawi lan a ni a. Project-2 hnuaia Water Supply atan Rs 6,463 /- lakhs leh Sewerage System atan Rs 3,540 /- lakhs ruahmanna hnuaia hmalak tawh dante tarlan a ni bawk. SIPMIU hnuaia thawk tur Officer leh Staff ruat chungchang leh Reforms Action Agenda chungchang te sawiho a ni bawk.

Vawiin meeting ah hian UD&PA Principal Secretary Pu R.L.Rinawma, DP&AR Commissioner Pu Chetan B.Sanghi leh PHE E-in-C Pu R.Lalfanliana te bakah PWD, Finance, Planning, UDPA leh SIPMIU hotute an tel a ni.