Vawiin khan District Level PYKKA Sport 2012 chu Pu V. Lalremthanga District Bawrhsap chuan Mamit khelmualah a khar.

Kharna inkhawm Pu Mickey Lalenkawla, SDEO Organising Secretary kaihhruaiah thusawiin Pu V. Lalremthanga, District Bawrhsap chuan Sawrkar-in thalaite hmakhua ngaiin an theihna te haichhuahna turin PYKKA Sport a buatsaih a, hei hi hmang tangkai turin sawrkar chuan min duh a ni, a ti a. Nawmsip bawlna tura buatsaih a nih loh thu tarlangin hriselna leh rilru chakna a tan sport hi a tangkai a, Sport lama mi hlawhtling te hi ruihtheih thil laka mi fihlimte an ni tiin infiammi thalai lo kalkhawmte chu ruihtheih thil laka inthirfihlim turin a chah a ni. Khuallian chuan infiamna-ah hian hlawhtlin loh chang pawhin rilru thianghlim tak kan put a, hlawhtlinna ngei ngei tura min fuihtu atan hmang tangkai theuh turin infiammite chu a chah bawk.

He District PYKKA Sport ah hian Zawlnuam RD Block chu Overall Champion niin 96 points an hmu a, W Phaileng RD Block chu pahnihna niin 44 points an hmu a ni.

He District Level PYKKA Sport 2012 Mamit-a buatsaih ah hian Discipline 9-ah in elna buatsaih niin Infiammi 120 chuang an tel a ni.

Heta ti tha team te leh Athletics a Gold Medalist te hian State Level ah Mamit District ai an awh dawn a ni.