State Vector Borne Diseases Control Programme (SVBDCP) buatsaih, ‘Training on Case Management of Dengue and Diagnosis’ chu PHC/CHC tina Medical Officer te tan Health Directorate Conference Hall, Dinthar ah tan a ni. He Training hi batch wise a then hran niin ni 2 awh tura ruahman a ni.

Training hi Dr. P. Sangzuala, State Public Health Consultant SVBDCP in kaihhruaiin Dr. Ramfangzauva, Director of Health Services in natna vei loh hi changkanna anih thu a sawi a, natna tih tlem hi hmasawnna anih zia a sawi bawk. Medical Officer te chu monthly report ngun taka bihchiang tura fuihin natna chungchangah mipuite hrilhriat a pawimawh zia a tarlang bawk. Hemi hnu ah Dr. F. Lallianhlira, State Programme Officer (VBD) chuan Dengue chungchang leh a enkawl dan chipchiar taka zirtirna a pe. Training ah hian Civil Hospital lama mithiamte leh Vector Borne Diseases Control Programme atangin thisen lak dan, enkawl dan, referral, those chungchang leh a inven dan, mipuite hnena zirtirna pek dan te sawiho ani bawk.

Malaria chauh nilo Dengue leh Chinkungunya enkawl turin State Vector Borne Diseases Control Programme chu Central Sorkar lamin kumin atangin mawhphurhna a pe a. Mizoramah hian Dengue emaw Chinkungunya vei hmuhchhuah ni rihlo mahse, natna thenkhat rinhlelh te chu phai lama thawn thin a ni a, hengah te hian case la hmuh loh an ni. Tunah erawh chuan heng natna enna tur Elisa test Kit chu Sentinel Surveillance site, Civil Hospital Aizawl ah hmantheih tura buatsaih mek a ni.

Dengue leh Chikungunya natna te hi thosi chi khat Aedes Aegypti in a thlen a ni a. He thosi hi rawng dum, a vara tial thet thet a ni a, zan lam nilovin ni enlaia seh thin a ni. Heng natnate lanchhuah dan hi a inang tlangpui hetiangin - khawsik, khur, luna, luak, ruhna leh taksa thak sen. Heng natnate hlauhawmna chu a hrik thahna tur damdawi bik a la awm lova, amaherawhchu a enkawl dan in thui takin nunna a chanhim thei a. Chuvangin, those seh laka inven nan - thosi hlo hman, mutnaa thosilen zar leh a bik takin naute leh naupang mut laia thosilen zar leh kawr ban tlawn hak a pawimawh hle.