Vawiin chawhnu dar 01:00 khan Pu Pankaj Pandey, IIS, Serchhip, Lunglei, Lawngtlai leh Saiha district tana Election Awareness Observer atana ruat chuan Serchhip District-in inthlanpui lo awm tur atana a inpuahchahna te a hmuna enchiang turin a  tlawh a, District Bawrhsap pisaah inthlan buaipuitu official te leh inthlan kaihhnawih committee hrang hrang a hotute bakah tlawmngai pawl hruaitute nen inkawmhona hun ṭha tak an nei bawk a ni.

Pu Pankaj-a hian inthlan lo awm turah mipui tam thei ang berin vote an thlak theih nana sawrkarin SVEEP campaign hmanga hma a lak dan te a rawn en thlithlai ber a. District Administration hmalakna chu fakawm a tih thu leh tih tur ṭul leh pawimawh zawng zawng chu ṭha taka hlen vek tawh nia a hriat thu leh thawktute inpekna chu ngaihsanawm a tih thu a sawi. Vawiin hian Aizawl lamah a let lehin Aizawlah Chawlhni a cham ang a, Thawhṭanniah Aizawl aṭanga lo chhuak lehin Thenzawl, Serchhip leh Hnahthial khuate a Voter’s Fecilitation Centre te a tlawh ang a, tlaiah Lunglei a lut ang.

He inkawmhona hi District Bawrhsap Pi Juhi Mukherjee IAS chuan a kaihruai a, thu sawiin sawrkar chuan inthlan lo awm turah mipui vote nei tam thei ang berin vote an thlak theih nan kawng hrang hrangin mipuite hnenah zirtirna a pe a ni a ti a, chanchinbu leh TV lamah te programme neih niin district chhunga cable TV operator leh sub-operator zawng zawng hnenah pek chhuah a nih thu leh tlawmngai pawl te kaltlanga a remchan dan ang anga vote thlak pawimawhzia zirtirna pek a ni a ti a. Hei bakah hian Anganwadi Worker leh ASHA worker te hmangin vote nei awmna in zawng zawng luhchhuah vek tura hma lak mek a nih thu a sawi a, Mizoramah inthlanna muanawm leh fel fai tak kan neih ngei a beisei thu a sawi bawk a ni.