Election Commission of India-in Mizoram District 4 - Serchhip, Lunglei, Saiha leh Lawngtlai vil tura a ruat Awareness Observer Pu Pankaj Pandey, IIS chuan Lunglei District a tlawh mek a. Vawiin chawhma khan DC’s Conference Hall-ah Election hunchhunga mawhphrurhna hrang hrang kengkawh tur officials-te nen inkawmna a neihpui a, he meeting hi Lunglei DC/DEO Pu V. Sapchhunga’n a kaihruai a ni.
Awareness Observer Pu Pankaj Pandey chuan inthlan lo awm turah voter tam theih ang berin vote an thlak theihna turin sorkar lam atanga hmalakna tur hrang hrang a sawifiah a, mipui ten inthlan chungchanga an hriat tur pawimawh puanzar lamah tan la zel turin officals te a chah bawk a ni.’Lunglei chhunga Systematic Voters Education & Electoral Participation (SVEEP) atana Nodal Officers ruat-te chuan HSS, College, HATIM leh Mizoram Polyetchnic-ah te Awareness Campaign’ an lo neihpui tawh chu a lawmawm hle a ni tiin Pu Pandey chuan heng zirna inah te hian vote nei thar (first-time voters) tur thalai engemawzat an awm thei avangin inthlan dan chungchang leh EVM hman dan tur thleng pawh chipchiar taka hrilhfiah leh zirtir a tul a ni, a ti. Tun inthlan-ah hian Election Commission chuan inthlanna boruak tichhe zawnga chetna, sum leh pai leh thildanga inthamna a awm a nih chuan a petu leh a dawngtu angkhat rengin hrem theih a ni tih a sawi a, hemi chungchangah hian mipuite chu hrilhhriat tam a tul thu a sawi a ni. Inthlan Ni-ah polling station hrang hrang-ah voter zingah tar leh upa zawk te bakah nu naupai rit tawh te an awm a nih chuan an thutna tur emaw remchang dang emaw siamsak turin a chah bawk a ni.
Pu Pankaj pandey hian Lunglei-a Voters Facilitation Centre (VFC) chu a tlawh nghal a. Amah tawiawmtu DEO leh Election officials te hnenah mipuite tan awlsam zawka EPIC Card lakchhuah leh siamthat a nih theih nan VFC-a thawkte chu taima taka hna an thawh a pawimawh thu a hrilh a ni.
Awareness Observer Pu Pankaj Pandey chuan nimin khan Thenzawl leh Hnahthial a tlawh tawh a. Zanin hian Lunglei-ah chamin naktuk zingah Lawngtlai leh Saiha lam a pan dawn a ni.
