3602/2022-2023

Aizawl, 16.02.2023: Vawiin khan Centre for Disabilities Studies leh State Commission for Persons with Disabilities te tangkawpin an buatsaih Awareness on Issues and Challenges of Persons with Disabilities in Mizo Society chu Aijal Club-ah neih a ni a. He hunah hian State Commission for Persons with Disabilities Chairman Pi Vanlaldiki Sailo chu khuallian a ni.

Khuallian Pi Vanlaldiki Sailo chuan rualbanlo kan tihte sawrkar chuan a ngai pawimawh chho zel a, an tan ruahmanna leh hamthatna tam tak siamin, sawrkar hna lak chungchangah pawh rualbanlote tan Rights of Persons with Disabilities, 2016 tlawhchhanin 4% dah sak an ni a, school admission tihnaah pawh 5% hial a dah tawh bawk a ni a ti a. Rualbanlote hamthatna atana pawl leh mimal thahnem ngai tak tak ten an lo thawhna rah chu tunah hian kan seng mek a ni a ti a. Tun dinhmunah hian District Level Committee on PwDs chu district tinah din a nih thu te sawiin NIELIT nen tang kawpin mitdel ten computer application course an zir theihna tur ruahman mek a nih thu sawiin Gilead Special School ah Digital Class Room siam a nih thu leh autistic te tan Smart Class Room buatsaih leh chhoh mek a ni tih a sawi a. State Commission for Persons with Disabilities hmalakna in Mizoram rualbanlo te data pawh District pathum tihloh ah chuan neih vek a nih tawh thu a sawi bawk a ni. Heng bakah hian Aizawl City Bus Owner's Association te nen tangkawpin Aizawl chhunga bus service zawng zawngah Rualbanlote tan thutna Reserve a ni tih tarlanna sticker bel vek a nih tawh thu a sawi a. MBSE in tun hnaiah Higher Secondary zirlat mitdel te tan Braille Textbook a siam thu a sawi bawk a ni. Vawiin a rualbanlote hamthatna tur zirchian leh harsatna an tawhte hrang hrang sawihona chu hlawk taka an hman turin kalkhawmte hi duhsakna a hlan a ni.

He programme a Resource Person te hi Pi Sangzuali Vanchhawng leh Michael Pachuau an ni a. He hunah hian Mizoram Blind Society, Gilead Special School, Thutak Nunpuite Team Pangpar Huan, Spastic Society of Mizoram, Shining Star Special School, Samaritan Blind School, Redeem Garden School, Spinal Cord Injury of Wheelchair Society, Mizoram atang ten an tel a ni.