3601/2022-2023
Aizawl, 16.02.2023: Vawiin khan sawrkar laipui Ministry of Corporate Affairs hnuaia Investor Education and Protection Fund Authority (IEPFA) leh Mizoram sawrkar Tourism Department tangkawp chuan “State Level Conference on Financial Literacy in Amrit Kaal” chu Aizawl Vanapa Hall-ah an buatsaih a. Tourism Minister Pu Robert Romawia Royte chu khuallian niin Chief Secretary Pi Renu Sharma chu khual zahawm a ni. He programme hi India ram zalenna kum 100 champhaphak thlen hma kum 25 “Amrit Kaal” hmalakna peng pakhat a ni.

Pu Robert Romawia Royte chuan Mizoram State tana Sawrkar Laipui leh Mizoram State Sawrkar tangkawpin financial literacy campaign an buatsaih chu lawmawm a tih thu sawiin, sum leh pai peipunna lam hawi inzirtirna hi Mizoram mipuiten kan mamawh hle a ni, a ti. Literacy (ziak leh chhiar thiam) ah Mizoram State chu India ramah a ti tha ber pawl a ni a, chutihlai erawh chuan sum leh pai lama thiamna financial literacy ah erawh chuan India ramah a hniam pawl a ni thung a, hei hian financial literacy kan mamawhna sanzia a tilang chiang hle a ni, Minister chuan a ti a. Savings Bank a pawisa dah ringawt a tawk lo a, sum leh pai humhim leh peipun dan zir hi kan mamawh hle a, investment lamah Mizo thalai te kan harh a ngai, khuallian chuan a ti a. Hemi kawnga India ram puma a tha ber te zinga miin Mizo thalaite an rawn zirtir thei hi a hlu hle a ni, tiin kalkhawm te tangkai taka hun hmang turin a fuih a ni.

Hmasawnna ngelnghet leh tluantling - sustainable development nei thei turin financial literacy a kan thiamna tihpun a tul, khuallian chuan a ti a. Tunlai khawvel khirh leh inelna sang tak hi thiamna leh hriatna nei te tan chuan chona a ni a, beiseina eng nena hmalam thlir thin, mi inzirpeih te tan chuan hlawhtlinna ropu tak chharchhuah theih a ni, a ti. Inzir zau leh inchhiar zau te chu thil pawimawh a ni a, information technology lama thiamna sang zel te pawh sum leh pai lama inbumna atana lo hmang tam tak an awm a, cyber crime laka invenghim turin hemi kawngah pawh hian nasa lehzual inzirtir a tul, tih thu Pu Robert Romawia Royte chuan a sawi bawk.

Khual zahawm Mizoram Chief Secretary Pi Renu Sharma pawhin thu sawiin zirna leh hriatzauna kawnga tha leh sum hman hi, thil dang zawng aiin a hlawk a, hlep a tam ber a ni, a ti. Mizoram chu kawng hrang hrangah a che tha hle a, hmarchhak state te zingah agriculture, horticulture, trade and commerce ah te phei chuan a hmahruaitu a ni a, amaherawhchu, financial literacy lamah hian hmabak ko tak, kawng thui tak zawh tur kan la nei, a ti a. Financial literacy lama sang tur chuan sum thawhchhuah ringawt a tawk lo va, mi thiam bikte kuta dah ringawt chi a ni lo a, mipui mimir a te ber atanga a lian ber thlengin sum siam thiam, khawl thiam leh sum peipun dan kawnga hma kan sawn a tul a ni, Chief Secretary chuan a ti.

Vawiin programme ah hian khuallian Pu Robert Romawia Royte chuan “75 Iconic Investor Awareness Programme (IAP) for Mizoram” a hawng a. Mizoram chhung hmun 75 ah financial literacy campaign hi neih chhunzawm tur a ni. Hei bakah hian hmeichhia te tan bika buatsaih financial literacy campaign “Niveshak Didi” hmalakna a hawng bawk a. Hmeichhe pathum hnenah Niveshak Didi pual hian certificate a hlan a ni. Vanapa Hall tualzawl atangin Investor Awarens Van “Niveshak Sarathi” chu khuallian Pu Robert Romawia Royte hian a vailiam bawk a ni.

“State Level Conference on Financial Literacy in Amrit Kaal” hi vawiin nileng a neih tur a ni a. Hawnna inkhawmah hian IEPFA CEO Pi Anita Shah Akella, IEPFA member Pu Gopal V.Kumar te bakah Tourism Secretary Pi Manisha Saxena leh Mizoram DGP Devesh Chandra Srivastava te pawhin thu an sawi.

He conference a tel tur hian entrepreneurs te leh zirlai te sawm an ni a. Mithiam bik ten thupui thlan bik hmangin kalkhawm te an zirtir a ni.