Vawiin khan Mizoram Science, Technology & Innovation Council (MISTIC), Directorate of Science & Technology chuan Mizo Writers’ Association (MWA) leh Mizo Academy of Letters (MAL) te tan ‘Awareness Programme on Copyrights’ hun buatsaihin, Directorate of Science & Technology Conference Hall, Mizoram New Capital Complex-ah he hun hi an hmang. He programme hi Dr.R.K.Lallianthanga, Chief Scientific Officer & Member-Secretary, MISTIC-in a kaihruai a; Mizoram Writers’ Association leh Mizo Academy of Letters-a member thahnem tak leh sawm bikten he hun hi an hmang.

Dr.R.K.Lallianthanga, Chief Scientific Officer chuan kalkhawmte lawmna thu sawiin MISTIC-in tun hnaia an hmalakna hrang hrang a tarlang a, Mizote hi ‘Intellectual Property Rights’ (IPR) lamah an la hnufual hle avangin hmalakna tur tam tak a la awm a, theihtawp chhuaha hemi kawnga hmalak zel a tul a ni a ti. Mizoram-ah IPR leh a kaihhnawih thildangte chu MISTIC hmalak turin sorkarin a dah thu a sawi bawk.

Mizo Academy of Letters President Prof.Laltluangliana Khiangte pawhin thusawiin IPR zirna hun pawimawh tak mai buatsaih a ni thei chu a lawmawm hle a ni a ti a. Mizorama thuziak miten Copyrights chunghchanga harsatna an lo tawh thin dante tarlangin, Mizo zingah ngei pawh 'plagiarism' (midang thuziak ruk chhawnna) nasat tawh ziate pawh a sawi. Copyright hnuaia dan hmangin thuziak miten an harsatna tawh thin chu nasa taka sutkian a nih theih dawn avangin lawmthu a sawi bawk. MAL chuan theihtawpin heng dante hi a thlawp tlat tur thu a sawi.

Mizo Writers' Association President Pu R.Lallianzuala pawhin lawmthu sawiin, Copyright hmanga thuziak miten an thuziakte an humhim theih tawh tur chu lawmawm a tih rualin, Copyright file tute pawhin an thuziakte pekchhuah zauhna kawnga hma an lak a tulzia a sawi bawk.

Pu Samuel Lalmalsawma, Senior Scientific Officer, MISTIC chuan Intellectual Property Rights hnuaia Copyright chungchanga hriatt tur pawimawh zual chi hrang hrangte powerpoint presentation hmangin kalkhawmte a hrilhfiah a, a huam chinte leh tangkainate a tarlang tel bawk. Mizo zinga thuziak lama tui miten Copyrights chungchang hi chiang zawka an hriat a tulzia a sawi a. Copyrights hman hian an thuziaksate dan anga humhim a nih theih dan a sawi bawk. Pu C.Laltlanzuala, Scientist-B, PIC, MISTIC pawhin power point presentation hmangin kalkhawmte zirtirna hun tha tak a nei bawk a, dan anga Copyrights file dan chi hrang hrang zirtirna hun hman a ni.