National Wildlofe Week, 2019 hman mek pualin vawiin chawhju dar 2:00 khan Khawzawl Wildlife Division leh Champhai Forest Division tangkawpin Nungcha te humhalh pawimawhzia inhrilhhriatna, Awareness Campaign on Protection of Wildlife neih a ni a, he hunah hian Khawzawl khawpui chhunga YMA Branch hrang hrang O.B. te, Khawzawl Group YMA O.B. te, Khawzawl Joint YMA OB, Joint VC OB te bakah Khawzawl khawpui chhunga Zirna In 4 zirlaite leh MJA Member te an tel a ni.

Khawzawl Group YMA President Pu K. Lalnunsanga kaihhruaia hun hmanah hian Pu PC. Rosiama, Hon.Wildlife Warden chuan thu sawiin, Thil nung tin reng hi kan inkungkaih vek, nungcha pakhat a danglam a, a ral hian a tuartu chu keini mihring hi kan ni, a ti a. Nungcha humhalh kan sawi thin leh Week hial a kan hmanna chhan hi keini mihringte damkhawchhuahna tura kan beihna a ni, a ti a. Vawiinniah hian kan ram, kan sakhua, kan culture leh hnam damna kan sawi thin a, hnam damna tihte kan sawi thin a, chung zawng zawng chu kan Ecosystem a dam loh chuan a dam dawn lova, Ecosystem a dik lohva, a fel chuan loh chuan kan hnam hi a dam dawn chuang lova. Hnam damna tak tak chu nungcha te nena kan inlaichinnaah hian a innghat a ni, a ti.

Pu PC. Lalchhandama, MFS, DFO, Khawzawl Wildlife Division chuan, Powerpoint Presentation hmangin The Wildlife (Protection Act), 1972 sawifiahna a nei a, he Act in a tum lian deuh deuh pathum te chu sapel khuahkhirh te, nungcha te humhalhna hmun bik siam te leh ramsa leh anmahni atanga thil chi hrang hrang  siam khuahkhirh leh heng hmanga sumdawnna khuahkhirh te a ni a ti a, he Act hnuaiah hian Schedule 6 a awm thu leh Schedule hrang hranga nungcha awm te a sawifiah a. Nungcha te zingah mihringte tana him lo ramsa an awm anih chuan Chief Wildlife Warden in kah phalna a pe thei a, hetianga engemaw bik thil thleng anih loh chuan sapel hrim hrim phal a ni lo tih a sawi a ni. Pu PC. Lalchhandama chuan, Wildlife (Protection Act) hnuaia hremna a pek theih dan te a tlangpuiin a sawi a, he huna telte chu Dan hnuaia hremna hlauh vanga sapel lo ni lova, khua leh tui tha nihna atang zawk a nungcha te humhalh turib a sawm a, nungcha humhalh chu midangte kutah dah lova, mahni theuhin theihna kawng zawnah theuh ti zawk turin a chah nghal bawk.

Pu Lalduhthlana, MFS, DFO, Champhai Forest Division pawhin ramngaw leh nungchate humhalh pawimawihna a sawi a. Pu Lalduhthlana chuan, mihringte mamawh chi hrang siamna tur Raw Material min petu anih vangte, chaw leh tui thianghlim min petu anih vangte, ramhmul damdawi kan hmuhna an nih avangte, sik leh sa vengtu a nih vangte, nungcha te chaw hmuhna anih vangte, natna hrileng thei vengtu anih vangte in ramngaw humhalh a tul tih a sawi a, nungcha te pawh Medicinal Value an neih dan te, buh leh thlai chinnaa an pawimawhna hrang hrangte pawh sawiin nungcha te leh ramngaw te pawimawhna hria a, a humhalhnaah tanlak nasat leh zual a tul tih a sawi a ni. Pu Lalduhthlana hian Mizoram Pollution Control Board leh ASEP tangkawpin Mizoram a Savate thlalak tarlanna leh an chanchin ziahlanna, Sirva Volume 1 chu vawiina Awareness Campaign a tel School hrang hrang hnenah Library a dah turin a hlan a ni.

He hunah hian Pu Lalchhuanmawia, ACF Retired leh Nula Zorempuii kaihhruaiin School zirlaite tan Quiz buatsaih a ni a, hetah hian PES Khawzawl pakhatna niin Far-East Experimental School chu pahnihna an ni.