876/2025-2026

Lunglei, 2025 Nikir thla ni 20: Lunglei District Administration hma laknaa Lunglei District-a vohbikte chawi kanna tur ruahmanna - Project LEAP (Lunglei’s Empowerment for Access and Equity for all Persons) hnuaiah vawiin khan Ṭawipui South PHC-ah vohbikte hriselna dinhmun endikna, health assessment camp buatsaih a ni.

He hunah hian Sub-Deputy Commissioner Pi Lalnunchhani Hnamte hovin Project LEAP leh Healthy Lunglei District Campaign team te'n kal chilhin, Ṭawipui South PHC-a thawktute nen camp hi an buatsaih a. Civil Hospital Lunglei aṭangin Dr Joseph Lalrindika Chawngthu, Sr Speciallist (Ortho); Pi Rachel Malsawmkimi, Audiologist; Pu Challiandinga, Clinical Psychologist leh Pi Lalrempuii, Opthalmic Assistant te chuan he camp pantute hi an endik a. Vohbik mi 42 inentirin, an vai hian Unique Disability Identity (UDID) card siamsak turin UDID portal-ah thun nghal a ni a. Health assessment camp pantu vohbikte hi an veivahna senso tumsak an ni bawk.

He hunah hian Healthy Lunglei District Campaign hnuaiah medical team-te'n natna inkai chhawn theih loh (non-communicable disease) - zunthlum leh thisensang endikna, screening an buatsaih nghal bawk a. NCD screening-ah hian mi 33 endik niin, thisensang hriat chhuah thar 4 leh zunthlum hriat chhuah thar 1 an awm a ni.