877/2025-2026
Aizawl dated 20th June 2025: Vawiin chawhnu khan Pu C.Lalsawivunga, Minister, Animal Husbandry & Veterinary Department chuan Zoram Poultry Development Society, Tanhril kum 10 tlin lawmna hun chu khuallian niin a hmanpui a. Dr.R.Zothanmawii, Director, AH&Vety Department chuan hun kaihruaiin Dr. V.Lalzarzova, Managing Director, ZPDS chuan report a pe a, tun dinhmunah ZPDS-ah hian ar note Nuai 1 thar chhuah theihna khawl a awm mek thu a sawi.
AH&Vety Minister Pu C.Lalsawivunga chuan ram hmasawnna tehfung pawimawh tak chu kawng hrang hranga intodelh hi a nih thu sawiin chung zingah chuan ei leh bara intodelh hi a pawimawh hle thu a sawi a. AH&Vety Department hmalakna hnuai a Zoram Poultry Development Society, Tanhril chu artui leh arsa hrisel leh thianghlima kan intodelh theihna tur a thawktu pawimawh tak an nih sawiin an hmalak tawhna chu lawmawm a tih thu a sawi.
Minister chuan artui leh arsa chu mihring hriselna atana pawimawh tak a nih angin intodelhna tluantling nei tur chuan ZPDS chuan hmabak thui tak a la neih thu a sawi a. AH&Vety Department a thawktute chu an thiamna leh theihna zawng zawng nen, ei leh bara kan intodelh theih nan theihtawp chhuaha thawk zel turin a chah a. Ran enkawl hna pawimawh tak mawhphurhna chelhtu an nih angin ran vulhtute ban phak leh rawn phak a awm reng a pawimawh thu sawiin thiamna chhawrtlak leh rintlak an neih theih nan inchhiar tam a, intathriam reng turin a fuih bawk a ni.
ZPDS, Tanhril kum 10 tlin lawmna hun ah hian Pu C.Lalsawivunga chuan ran vulhtute mamawh pawimawh tak chu ran chaw tha, mamawh ang tawk neih a nih thu a sawi a. Chumi tihlawhtling tur chuan Mizoram hmun hrang hrangah ran chaw chinna turin ruahmanna siam mek a nih thu a sawi a. Bana Kaih Scheme hnuaiah ran vulh kawnga hmalak tum mi thahnem tak an awm thu sawiin he hmalakna hlawhtlinna tur hian AH&Vety Department a thawktute thahnemngaihna a pawimawh hle thu a sawi bawk a ni.
Dr. V.Lalzarzova, Managing Director tarlan danin Zoram Poultry Development Society hnuai a INDBRO Poultry hatchery Farm hi ni 18 May, 2015 khan A.H & Vety Department farm ‘Regional Broiler Chick Farm’ Tanhril awmna thin a din a ni a. A bultanna atan NABARD RIDF (XVII) 2012 leh RKVY sum hmangin kar khatah ar note 20,000 thar thei tur a din niin, NABARD RIDF (XXVI) 2020-21 sum leh SASCI 2021-2022 sum hmanga tihchangtlun a nih leh hnu ah hian kar khat ah ar note 40,000 ve ve thar theihna tur a tihlen a ni leh a, tun ah hian kar khat ah ar note 1,00,000 thar theihna khawl a awm mek thu a sawi.
ZPDS, Tanhril hi member pasarih awmna, ZPDS Governing Body-in an enkawl a, a hmunah hian thawktu 16 an awm mek a ni. Artui tih keuna leh arte enkawlna khawl hrang hrang bun a ni a, chungte chu artui awp lumna khawl Setting machine-te, artui awp keuna khawl Hatching Machine-te, Breeder House, Grower House, Slaughter House leh Egg Storage Room-te an ni.
Kum 2015 atanga 2025 thleng khan ZPDS-ah hian artui 33,61,320 tharchhuah a ni tawh a, kum 2024 kha artui tharchhuah tam ber kum niin artui 5,86,362 tharchhuah a ni. Kum 2016 atangin Brown Layer, Rainbow Rooster leh Broiler note tharchhuah tan a ni a, kum 2025 thleng hian ar note 21,24,869 tharchhuah tawh a ni bawk.
