878/2025-2026
Aizawl, 20th June, 2025: Vawiin khan Pu Lalrinenga Sailo Aizawl Mayor kaihhruainain Aizawl Municipal Corporation (AMC) leh Zotrek Adventure Club aiawhten Mayor Office Chamber-ah Aizawl khawpui chhunga rikrum thila hma lak dan tur ruahmanna an sawi ho.
Aizawl Mayor chuan chhiatrupna a lo thlena chhanchhuah hna leh a tul ang te thawh hi AMC kuta dah ni chiah lo mah se AMC leh Corporator te tel ve loh theih lohna thil tamtak a awm chho a. Tin, Aizawl khawpui enkawltu nihna angin Disaster Management Authority leh Disaster Response Force te hnathawh bak bawhzui ngai te awm ve fo thei a nih avangin AMC tan Emergency Response Team neih hi a tul ve tawh a ni a ti a. State sawrkar hnuaia Disaster Management thuneitute nen insu buai lovin mumal taka thawk ho tura ruahhman a nih tur thu a sawi a. Hetiang kawnga Zotrek Adventure Club an rawn pen chhuak chu lawmawm a tih thu a sawi.
Aizawl Municipal Corporation leh Zotrek Adventure Club te hian thawh ho rem tiin hma lak dan tur te sawi ho nghal a ni a. Meeting-ah hian AMC atangin Pu Lalringliana, Executive Corporator; Pu Laltlanzova Khiangte, Executive Corporator; Pu Rosiamngheta, Corporator; Pu David Zohmangaiha, Corporator leh AMC official te, Zotrek Adventure Club aiawh te an tel a ni.
