879/2025-2026

Excise and Narcotics Dept. Minister chuan Mizoramah kum 2024 chhungin excise in ruihhlo an man zingah heroin kg 46.68 lai an man thu leh Mizoram police Department man zat chu kg 80.81 (a belhkhawm hi kg 127.49) a tlin thu sawiin, ruihhlo do hna tih takzet a thawk a, ruihhlo ngaite enkawl kawnga hmasawn a tul thu a sawi. Heng hi YMA Tlangnuam Branch in June ni 21, 2025 zana YMA Day vawi 90 na an buatsaih a hmanpui naa a sawi a ni.

Minister Pu Lalnghinglova Hmar chuan ruihhlo thahnem tak man ni thin mahse man loh tam tak a awm tiin, heng ruihhlo a hlawma man hi Mizorama ami tur ni lovin, a tawlh nan an rawn hman thu leh nasa takin khawchhak atangin a rawn chhuk thlak thu a sawi.

Minister chuan Zoram dinhmun a chhiat hle thu sawiin, in chiu thin hi mi 14,000 bawr an awm a ni a ti a. YMA te chuan ruihhlo do kawngah bul kan tan a ngai a ni a ti. Ruihhlo ngaite hi kan vei a tul takzet a, kan beidawn san mai tur a ni lo tiin, Kohhran hrang hrang hruaitu te nen theihtawp chhuahin, a huhoin camping vawikhat tal kan siam a ngai a ni a ti a. Excise Minister chuan hripui len laia, a enkawl na hmun tura sorkar a beidawn tep laiin, Kohhran a inrawlh a, nasa takin a chhawk a. Chutiang bawkin ruihhlo ngaite chhan chhuah kawngah Kohhran te hian tangrual in mawhphurhna la turin a ngen a ni.

Excise Minister chuan he huna Zirlai Pass thar chawimawina pek te chu fuihna thu hrilhin, ruihhlo tih hi duhthlanna a ni tih sawiin, thuthlukna dik siam turin a chah bawk. 

YMA Tlangnuam Branch te’n Tlangnuam Community Hall-a YMA Day an hmanna hi Branch YMA President Pu T Zorammawia chuan a kaihruai a, HSLC leh HSSLC exam a pass thar te lawmpuina thilpek hlanna leh YMA Day pual a Essay Inziahsiak lawmman te sem a ni bawk.