No.2213/2021-2022

Aizawl, the 14th September, 2021: Covid-19 hri do dan kawngah awmze nei zawka hma lak a nih theih nan leh, tul lem lova midangte chunga harsatna siam thei chi hmalakna laka Champhai District a fihlim theihna tura District Disaster Management Authority (DDMA) meeting, September ni 13, 2021 a neih thurel bawhzuiin Pi Maria C.T. Zuali, Deputy Commissioner, Champhai District chuan Champhai District chhunga VLTF leh Covid-19 dona kawnga hmalatu zawng zawngte zawm theuh tur thuchhuah hetiang hian a siam:

1. District pawn atanga lo zin emaw, zin hawte chu rinhlelhna tur chhan tha tak a awm emaw, a hri vei tura rinhlelhna chhan tur natna an nei emaw a nih loh chuan khunghran (quarantine) tawh loh tur a ni a,
Covid Fee Certificate phut thin pawh tih tawh loh tur a ni.

2. Sawrkar-in inkaihhruaina (guidelines) a siam zirchiang chungin Contact Tracing fimkhur taka kalpui tur a ni a, Primary contact leh Secondary contact bakah high risk leh low risk-te thliar hrang chungin Contact Tracing kalpui thin tur a ni. Positive bula kal satliah emaw, inhnaih satliah zawng zawng quarantine zel thin titawpin mumal deuh leh awmze nei zawka Contact Tracing kalpui tur a ni a. Contact Tracing tih dawnin Health & Family Welfare Department-in thuchhuah (SOP) a siamte zir chian hmasak phawt thin tur a ni.

3. VLTF leh Damdawiin lama thawktute buaina leh harsatna tam tak chhawk a nih theih nan Covid-19 positive natna lang chhuak lote chu 3C leh 4C a indah aiin a theih hram chuan Home Isolation kalpui uar tur a ni.