No.2212/2021-2022

Aizawl, 14th September, 2021 : I&PR Minister Pu Lalruatkima chuan vawiin khan I&PR department hmalakna pawimawh tak NEC kaltlanga sak “Lianchhiari Run Multi-Facility Centre”, I&PR Directorate, Treasury Square bula mi chu a hmunah tlawhin hnathawh kal lai mek a endik.

I&PR Minister chuan “Lianchhiari Run Multi-Facility Centre” sak mek chu Mizoram tan rotling tur a nih avangin theihtawp chhuaha uluk taka sa turin contractor te a hrilh a, hnathawh tawh chinah a lungawithlaka a hriat thu sawiin, a hun taka sa zo ngei tura tan lak a tul tih a sawi a. A satu contractor ten an mutan leh ngaih pawimawh an sawite ngaihthlak sakin a theih ang anga bawhzui a tum tih a hrilh a ni.

“Lianchhiari Run Multi-Facility Centre” hi NEC project niin cheng vaibelchhe 10 senga sak tura ruahman a ni a, a satu atan hian Lushai Engineers thlan niin , tunah hian hna 82 % an zo tawh a, ruahman ang chuan March, 2022 ral hmaa sak zawh tur a ni.

“Lianchhiari Run Multi-Facility Centre” sakna tur DPR hi NEC chuan April ni 11, 2017 khan pawmpuiin a hnu lawkah 1st instalment Rs. 100 lakhs a sanction a, harsatna eng engemaw chinfel tur a awm avangin a hun taka sak tan theih a ni lova, kum 2019 atang khan sak tan a ni. “Lianchhiari Run Multi-Facility Centre” ah hian motor engemawzat dahna tur multi-level parking bakah Conference Hall te, Mini Theatre, Art Gallery, Editing facility, Studio etc., te a awm dawn a ni.

Minister Pu Lalruatkima hi I&PR Secretary Pi H. Hualsangi, Director Pi Lallianpuii bakah I&PR officials te leh a satu Contractor ten an tawiawm a ni.