Vawiin khan PHE Engineer-in-Chief pisa ah PHE Department leh I&PR Department official ten mipuite rawngbawlsak kawnga  awmze nei zawk leh tangkai lehzual zawka hmalak dan tur an sawiho.

Er. Lalmuanzova, E-in-C, PHE Department chuan inkawmhona hi kaihruaiin  PHE Department hmalakna leh hmachhawp chi hrang hrang te a sawi a, mipuite rawngbawltu pawimawh tak an nih avangin an rawngbawlsak mipui te nen inrintawnna leh thawhhona tha an neih theih nan an hnathawh leh hmalakna chi hrang hrangte an hriatchian chu thil pawimawh tak ani a ti a, hemi tur atana I&PR Department ten hma an la chu lawmawm a tih thu a sawi a ni.

Vawiin inkawmhona ah hian PHE Department hnathawh kal lai mek leh hmachhawp chi hrang hrang ngaihthlakho a ni a, PHE Department hian Aizawl khawpui chhunga tui pipe an phum te chu a hma ami kum upa tawh tak aia tha zawk leh tlo zawk a thlak turin hma an la mek a, heng pipe phum thar te hi a hma ami anglo takin uluk takin an tuam vek zel a, kum rei tak puak keh lovin a hman theih tawh dawn a ni.  Greater Aizawl Water Supply Scheme Phase-I hnuaiah nitin tui litre nuai 80 leh Greater Aizawl Water Supply Scheme Phase-II hnuaiah nitin tui litre nuai 150 an pump thin a, tui pump nan darkar 24 chawl lova an thawh bakah an tui sem thianghlim leh thianghlim loh pawh uluk takin an endik reng zel a ni. Internet hmang thei te tan online in tui bill a pek theih tawh a, tunah hian mihring ek paih fai dan thianghlim leh him zawk “Septage Management” chu an zirchiang mek a, a hlawhtlin chuan mipuite hnenah zirtirna an pe chhawng leh dawn a ni.

Vawiin inkawmhona ah hian awlsam zawk leh rang zawka mipuite hriat tur thil pawimawh  thehdarh dan tur, PHE Department in mipuite tana hma a lak chi hrang hrangte mipuite hriata pho chhuah dan tur leh Department hmalakna chi hrang hrangte mipuiten an hriatchian lehzual a; neitu nihna rilru an put theihna  tura zirtirna tha zawk pek (Awareness/Sensitisation Campaign) dan tur te leh thawhho dan tur chi hrang hrang an sawiho a ni.

Vawiin inkawmhona ah hian PHE Department aiawhte hi Er. Lalmuanzova, Engineer-in-Chief in a ho a, I&PR Department aiawhin Pi Lalnithangi, Director, Pu David L. Thangliana, Jt. Director leh Pi Lallianpuii, Jt. Director te an tel a ni.