India ram pum huap, hriselna beihpui thlakna programme pawimawh tak, Ayushman Bharat chu  tukin zing karah khan Vanapa Hall atanga Millenium Centre thleng, Healthy India Fortnight Walkathon  programme hmangin kawng zawha tan a ni a. He hun pawimawh tak hi Dr.ZR Thiamsanga, MLA, Vice Chairman, Health & Family Welfare Board chuan khuallian niin a hmanpui a.

He Ayushman Bharat Pakhwara Fortnight hawnna inkhawm Millenium Centre kawtah neih a ni.

Ayushman Bharat Pakhwara Fortnight hawnna inkhawma thusawitu, Dr.ZR Thiamsanga chuan hriselna hlutzia leh man to zia hriatna kawngah mipuite kan thangharh ve ta tial tial chu lawmawm a tih thu a sawi a. Hriselna ngaih pawimawh nachang hriat deuh deuh a hun tawh a ni a ti. MLA Dr.ZR Thiamsanga chuan, "Tunah hian miharsa zawkte pawhin huamzau zawka an hman tlan theih tur, mitin huapzo Health Care changtlang zawka duan hmang tan turin  Mizoram sawrkar leh Health Department thawktu lamte an inpuahchah fel thawkhat tawh a. He Health Care scheme thar hi October ni 1-ah Chief Minister Pu Zoramthanga'n a hawng dawn a ni", a ti. Hriselna kawnga sawrkar hmalaknate chu mipui tan a nih angin a hlawhtlinna kawngah pawh mipuite phurna leh tawiawmna a pawimawh dawn hle a ni a ti.

Health Department hotute sawi dan chuan India ram hi hriselna kawngah khawvel ram dangte ngaihtuah chuan kan sang lem lo hle a. Thailand-ah chuan hriselna atana sum an hman ral zawng zawng 77.8 % hi sorkar tum a ni a, mimal tum chu 11.9 % chauh a ni. Hetih lai hian India rama hriselna atana kan senral zawng zawng zingah Sawrkarin Hriselna atana a thawh ve (Govt Health Expenditure) chu 30% chauh a ni a, hemi kawngah hian khawvelah ram 191 ah India hi 176-na kan ni. Hetih lai hian WHO tum dan chuan ram zawng zawngin kum 2030 ah chuan ram hrang hrangin Universal Health Coverage an kalpui tawh tur a ni tih a ni a. Universal Health Coverage chu mi zawng zawngin sum leh paiah harsatna neih phah lova healthcare an dawng phak ang tihna a ni. Rampum hriselna atana pawimawh em em chu Universal Health Coverage neih hi a nih avangin  chu UHC nei thei tur chuan India sawrkar pawhin scheme pawimawh em em mai ‘Ayushman Bharat’ hi a duang chhuak ta a ni.

Ayushman Bharat thil tum ber chu mipui tan hriselna tluantling (holistic healthcare) pek  a ni a. Prevention (invenna),health promotion (hriselna inzirtirna), primary, secondary & tertiary level care (damdawiin tenau atanga lian ber thleng a inenkawlna) te a huam a ni.

Kum 2022 a lo thlen huna Health & Wellness Centre nuai 1.5 siam te, Sub centre zawng zawng leh PHC zawng zawng Health & Wellness Centre a leh vek a, chuta tanga Comprehensive Primary Health Care (CPHC) services pek te, PMJAY hmanga mipuite a thlawna damdawiina inenkawlna tur pek bakah  chhung tinte’n kumkhata cheng nuai nga thlenga an bill theihna tur leh thildangte a huam a. Mizoramah pawh Ayushman Bharat Pakhwara (Healthy India Fortnight) ah hian AB awmzia leh hmalakna nasa thei ang bera puanzar a ni dawn a ni. 

He Ayushman Bharat Pakhwara Fortnight hawnna inkhawm hi Dr.Eric Zomawia, Mission Director, NHM chuan a kaihruai a. Thusawi,  Dr.F.Lallianhlira, Principal Director Health & Family Welfare leh Dr.Biakthansangi, CEO, Health Care leh  Dr.Lalzepuii, Jt. Director Planning te hnen atangin ngaihthlak a ni a. Vawiina AB Walkathon-ah hian TKP member, Baptist Mission Vengthlang Unit leh Health & Family Welfare hnathawkte an thawk chhuak a ni.