FCS&CA Minister Pu K Lalrinliana chuan vawiin khan Thingdawl khua Tobacco Free village a puanna hun chu khuallian niin a hmanpui.

He hunah hian khuallian chuan thu sawiin Tobacco free village ni tura Thingdawl Anti Tobacco committee te hmalakna chu fakawm a tih thu a tarlang a, vaihlo, zuk leh hmuan zuna uai tawh te tan chuan nghei mai chu harsa tak ani tiin tih takzeta tum erawh chuan thil theih ani a, tur hlauhawm tak pai an nih avangin ti tura induhsakna chi a nilo a ti.

Vaihlo do chu Ram leh Hnam chhanna tha tak ani tiin vaihlo, zuk leh hmuam laka fihlim te dinhmun chu a tha bik hle  a, a laka fihlim turin chhungkua leh khawtlang ah kan in zirtir nasat a ngai a, tih takzeta do a hun a ni a ti bawk.

Kalkhawm nu leh pa bakah zirlai te chu fuihin, vaihlo laka fihlim chu hriselna a tan a that mai bakah rilru chakna te ani a, naupan lai atanga tihchhin tum hauhlo tur ani tiin chhungkaw tana sum leh pai heksak lohna a nih bakah Pathian in duh taka a siam mihring taksa chu hrisel taka kan vawn theihnan thianghlim taka enkawl chu mihring te mawhphurhna ani a ti.

Pi Lal Riliani, President Indian Society on Health & Tobacco Mizoram, chuan Mizo te chu vaihlo tur in min run nasa em em a, natna chi hrang hrang a bikin cancer lakah kan him loa, cancer chi hrang hrang ah Mizoram chuan pakhatna dinhmun kan luah nasa hle a, hnam hriselloa min siamtu vaihlo, zuk leh hmuam chu Mizo ten kan do a hun takzet ani a ti.

Tobacco free village tih hian chu khuaah mei zu, sahdah/khaini leh tuibur hmuam zawng zawng awm tawh lohna khua leh lei tur pawh awm tawhlo na khuaah puan ani ta tihna lam a kawk loa, COTPA 2003 dan ina zawm tur a zam te zawm tha khua/hmun tihna a ni.  Vantlang hmuna school, college, hall etc meizuk loh, naupang kum 18 tlinglo hnena vaihlo, zuk leh hmuam hralh loh, zirna in bul hnai feet 300 bial chhunga vaihlo zuk leh hmuam zawr loh a ni.

Thingdawl hi Mizorama Tobacco free village a puan pathumna niin Thingsul  Tlangnuam (kum 2013) leh Ruantlang (kum 2017)
khua te chu puan an lo ni tawh a ni.

Tobacco free village puanna hun hi Indian Society on Health & Tobacco Mizoram, National Tobacco Control Programme Mizoram leh Anti-Tobacco Committee Thingdawl ten tanghoa an buatsaih a ni.