Vawiin khan India ram puma hman tur scheme thar Ayushman Bharat Pradhan Mantri Jan Arogya Yojana (PMJAY) chu Prime Minister Narendra Modhi-in Jharkand, Bihar-ah a launch a. Hemi rual hian India ram State hrang hrang AB PMJAY hi an launch ve bawk a ni.
Mizoramah hian AB PMJAY launching programme hi vawiin Pathianni chhun dar 12:00 khan Directorate of Health Services, Conference Hall-ah Video-conferencing nena hun lo hman a ni. A hawnna hun tak erawh chu naktuk 34.9.2018 hian Chief Minister hovin hman ani ang.
Vawiinah launching programme hi Dr. Zohmingsanga, G.I.Z. Consultant-in a kaihruai a. Chairman welcome speech a sawi hnu-ah Beneficiary-te hnenah Golden Card pek chhuah nghal a ni a. Hemi hnu hian Dr. Biakthansangi, CEO, SHA hnen atangin AB PMJAY chungchang ngaihthlak a ni a. Insurance Company aiawhte hnen atangin thusawi ngaihthlak a ni leh a. Hun tawp hi lawmthu sawina in Dr. Isaac Lalrawngbawla’n a khar a ni.
Ayushman Bharat Pradhan Mantri Jan Arogya Yojana (PMJAY) hi RSBY, kumkhata Rs. 30,000/ thleng bill theihna shceme thlakna tur a ni a, kumkhata chhungkaw khat in Rs. 5 lakhs thleng hman theihna a ni. Mizoram-ah chhungkaw nuai 2 chuang in an hmang thei dawn a, sum senglo a inenkawl theihna hmanrua a ni. He ruahmanna hian damloh nikhua a senso hautak, retheihna ti zual zel thei tur a veng thei ang. He ruahmanna hian PMJAY chu khawvel a sawrkar hmalakna hnuaia hriselna lama inhumhimna leh invenna lian ber a ni dawn a, Hei hian enkawlna ban phak leh tha mipui tan a chhawpchhuak dawn bawk a ni.
Chhungkua member limit a awm dawnlo a, tin he scheme a tel thei SECC a awm leh RSBY a in register te tan a thar a in register a ngai lo. Healthcare a in register tan erawh Sawrkar laipui in tuna PMJAY hnuaia leng thei tur list ah a dah rihloh avangin register fee lak a ngai dawn ani. Kumin atan hian Healthcare a la inregister lo tan Rs. 1500/- ani anga, mahni bial Sub-Centre-ah theuh October thla chhunga register theih tura ruahman a ni.
PMJAY hnuaiah hian natna leh enkawlna 1350 chuang a awm a, nuai 5 thleng hman theih tih nimahse, package rate bithliah ang zel bill siam tur a ni ang. Mizoram chhungah chuan Sawrkar damdawiin leh Private damdawiin zawng zawnga hman theih turin ruahman a ni a, phai lama Mizo ten kan pan thin damdawiin te pawh hman theih turin chhawpchhuah a ni.
He scheme atan hian sawrkar laipui chuan February 1 khan union budget ah a puang a, Cabinet in March 20 khan a pawmpui a. Felfai taka kalpui a nih theih nan dan leh dun chi hrang hrang duan a ni a. eg. BIS, bill pek dan (Claim Settlement), Lungawilohna thlenna (Grievance Redressal), damdawiin empanel dan, khawl hmantheih dan (quality guidelines), internet muanna/awmthatlohna a bill siam dan, etc.
He Scheme enkawltur hian sawrkar laipuiah National Health Agency, CEO enkawl din a ni a. State tin ten State Health Agency din tur anih angin, Mizoram State Health Care Society chu SHA a designate a ni a. he sheme kalphung hi tunlai thiamna IT, internet hmang a ni. He IT hnuaiah damlo enkawl ngai finfiahna Beneficiary Identification System (BIS) an tih hnuaia infinfiah hnua hman theih chauh tur a ni. Hei hi a hmang tur dik takin an hman theihna tura ruahmanna a ni. Damdawiin enkawlna senso pawh Transaction Management System (TMS) hmangin damdawiin ten an bill let dawn a ni. Hemi chungchang leh PMJAY kaihnawih thil te chu Mizoram ah training zawh a ni tawh a, a hman dan tur pawh Private damdawiin lam nen training pek vek an ni tawh a. Khawl pawh a thleng tawh a, tunkar chhung hian damdawiin zawng zawngah bun zawh vek theih turin hmalak a ni.
Tunah hian State/UT 30 in kengkawh nghal turin MoU an sign fel tawh a. Kerala, Karnataka, Delhi leh Punjab ten MoU sign mai turin hma a la mek a, hma la la lo chu Odisha leh Telangana chauh an ni tawh a ni.
Mizoram ah chuan Healthcare Scheme nen chhunfin tur a nia, hei hian a enkawlna kawngah pawh awlsam zawkin, mipui tan a chenfakawm zawk dawn a ni. Mizote hriselna hmasawnna rahbi sangzawkah hlanchhoh a ni dawn a, hmasawn zelna tur pawh Pathian zarah ngaihtuah chhuah zel theih beisei a ni. Chuvangin PMJAY programme, hi vawiin hian Prime Minister in ram pum tan leh Mizoram ah ngei pawh hman anih theih nan thehchhuah a ni.
