No.2222/2021-2022

Aizawl, the 15th September 2021 : India ramin zalenna a hmuh cham vawi 75-na lawmna, ‘Azadi Ka Amrit Mahotsav’ kalpui mekah Swachh Bharat Mission (Grameen) buatsaihin vawiin atang khan Champhaiah faina hnatlangpui 'Swachhata Shramdaan' kalpui tan a ni.

Faina hnatlangpui 'Swachhata Shramdaan' hawnna hun Circuit House tualzawl Champhaia neih hmanpuitu District Water & Sanitation Mission Chairman, Pi Maria C.T Zuali, D.C Champhai chuan ai leh thianghlim ni turin kawng hrang hrangah tanlakna tur a awm thu sawiin, taksa, in leh a vel bakah khawtlang fai leh thianghlim siam turin kan zavaia tanrual a tul a ni, a ti a. District mawi leh sik leh sa nuam tak Champhai District mawina leh nawmbikna chu ngaihhlutna chang hria a, neitu thinlung pua enkawl thin turin mipuite a sawm a. Lenvelna hmun nuam tak tak leh chawlhbuk chhehvela bawlhhlawh thehthang mai mai a ni thin chu veiawm a tih thu leh faina kawnga tanlak kan la ngaihzia chiang taka a tarlan thu a sawi bawk.

Faina tluantling nei turin naupan lai atanga inzirtirna kalpui tam a pawimawh thu sawiin, nunphunga lakluha tihthana neih a ngaih thu a sawi a. A paihna hmun ni lova bawlhhlawh paih tihreh a nih theih nan tanrual a tul thu sawiin, faina chu midang kuta dah mai lova mahni ngeiin a taka lantir tur a ni, a ti a. Azadi Ka Amrit Mahotsav kaltlanga faina hnatlangpui neih tan tur chu faina kawnga Champhaiin tangkai taka a hman ngei beiseiin a hawng a ni.

He hun hi Er. C. Lalhmachhuana, S.E, PHED chuan kaihhruaiin kalkhawmte lawmna thu a sawi a. Nl. T. Ramthanmawii, Miss Mizoram, 2018 hnen atangin 'Faina leh Thianghlimna' tih thupui hmanga thusawi ngaihthlak a ni a. 'Bawlhlawhin hriselna a nghawng dan' tih thupui hmanga Nl. Lalmuansangi, Miss India Mizoram, 2020 in thu a sawi hnuah Pu Lalduhthlana, DFO Champhai-in Plastic Waste chungchang a sawifiah bawk a. Pu T.T Laltanpuia, DEO Champhai-in lawmthu sawia hun a khar hnuah Swachhata Shramdaan (Faina hnatlangpui) neih chhunzawm nghal a ni.

Faina hnatlangpui hi thuang thumah inthena neih niin, Khankawn to Zotlang Road, Vengthar to Keilungliah leh Mualnuamah te bawlhhlawh thianfaia hnatlang neih a ni.

Azadi Ka Amrit Mahotsav lawmna peng pakhat faina kawnga hmalakna kalpui mek zelah District Water & Sanitation Mission ruahmannain September ni 20, 2021 hian VC tinte Single Use Plastic hmang lo tura intiamna (resolution) pass tura ngenna/hriattirna siam a ni dawn a, Plastic hman that loh zia inzirtirna hrilhhriat nghal tum a ni. October ni 2, 2021 hian Swachh Bharat Diwas lawm nan Champhai, Khawbung leh Hnahlanah te Faina hnatlangpui neih tura ruahmanna siam a ni bawk.