1080/2022-2023
Mamit 29th June, 2022 : Aspirational District, Mamit huapa India ramin Kum 75 a tlin lawmna kalzel Azadi Ka Amrit Mahotsav hnuaia intihsiakna chi hrang hrang neiha lawmmante nizan khan Govt. Mamit College, Mamit-ah semna hun hman a ni a. Pu Lalnunhlua, Mamit District Bawrhsap chuan khuallian niin he hun hi a hmanpui.

Khuallian chuan Mamit District chu Aspirational District kan nih angin kan District chawikan nana theihtawpchhuah turin kalkhawmte a sawm a. Intihsiakna hrang hrang hlawhtlin nana participates te chungah lawmthu a sawi bawk.

Azadi Ka Amrit Mahotsav (AKAM) pual hian District huap intihsiakna chi hrang hrang, Essay, Water & Sanitation, Arts Competition bakah Quiz Competition neih a ni a. Essay hi School leh Office Level-a neih niin School Level-ah lawmman pakhatna hi Joseph Vanlalmuana, Class X, BCM High School, Damparengpui chuan a dawng a. Lawmman pahnihna hi C. Vanlalnunpuii, Class X, Govt. Higher Secondary School, Kawrthah chuan dawngin pathumna lawmman hi Lalhriatpuii, Class X, Presbyterian English School, Mamit chuan a dawng a ni. Essay Office Level-ah lawmman pakhatna hi Dr. Francis R. Lalthantluanga, Dental Surgeon, DMS chuan dawngin lawmman pahnihna hi Pu Paul Rokima, DIPRO, Mamit chuan a dawng a. Lawmman pathumna hi Pu Lalthanmawia, Asst. Manager, MRB, Mamit Branch chuan a dawng bawk.

Water & Sanitation inelna-ah lawmman pakhatna Water & Sanitation (WATSAN) Committee, Hriphaw chuan lain pahnihna Water & Sanitation (WATSAN) Committee, Lallen-in an la a, lawmman pathumna hi Water & Sanitation (WATSAN) Committee, Tuirum-in an dawng a ni.

Arts Competition, Class VII - Higher Secondary zirlai naupangte'n an neihah lawmman pakhatna Freddy R. Lalthianghlima, Class VIII, Adventist English School, West Phaileng, pahnihna Lalhriatpuia, Class X, Baptist English School, Zawlnuam bakah lawmman pathumna hi Lawrence Lalruatkima, Class X, St. Francis of Assisi H/S, Mamit-in a dawng a ni.

Quiz Competition-ah lawmman pakhatna Govt. Higher Secondary School, Mamit, pahnihna Govt. Higher Secondary School, Kawrtethawveng leh lawmman pathumna hi St. Francis Xavier High School, Kanhmun-in an dawng bawk a ni.

He hunah hian Pu Laldingliana, DEO/DPC chuan inlawmna thu sawiin Pu H. Darhmingliana, Dy. DPC (E), Samagra Shiksha chuan lawmthu sawina a nei bawk.