No.2166/2021-2022

Aizawl, the 8^th September, 2021:  India ramin zalenna a hmuh cham vawi 75-na lawmna, ‘Azadi Ka Amrit Mahotsav’ puala Swachh Bharat Mission (Grameen) hnuaia programme neih dan tur chungchang relin Champhai District Water & Sanitation Mission chu an Chairman Pi Maria C.T Zuali, District Bawrhsap hovin vawiin tlai dar 4 khan DC Conference Hall-ah an thukhawm.

District Water & Sanitation Mission Chairman Pi Maria C.T. Zuali, District Bawrhsap chuan India ram fai leh thianghlim siam turin sawrkar laipuiin nasa taka tan a lak thu sawiin, Champhai District fai leh thianghlim siam kawngah theihtawp chhuah a nih mek laia bawlhhlawh paihna ni lova paih an awm thin chu pawi a tih thu a sawi a. Bawlhhlawh paihna hmuna paih leh plastic hman tlem kawnga tanlak a tul thu a sawi bawk.

 
India ramin zalenna a hmuh cham vawi 75-na lawmna  Azadi Ka Amrit Mahotsav pual hian Sawrkar laipui Department of Drinking Water and Sanitation (DDWS), Ministry of Jal Shakti chuan India ram pumah programme hrang hrang kalpuiin a buatsaih a. Champhai District-ah pawh District Water & Sanitation Mission kaltlanga programme neih a nih theih dan turte he hunah hian ngaihtuahho a ni.

Azadi Ka Amrit Mahotsav hnuaia programme hrang hrang neih dan tur Department of Drinking Water and Sanitation (DDWS), Ministry of Jal Shakti-in a duante chu Champhai District-ah buatsaih a nih theih dan turte sawiho a nih hnuah, District khawpui leh khaw dangahte a theih leh remchan dan ang zela kalpui nise tih a ni a. Programme hrang hrang kalpui tur khuhhawnna hun September ni 15, 2021 hian buatsaih nise tih a ni a. Satyagrah se Swachhagrah Rath Yatra, Swachhata Hi Seva (SHS), Swachhata Samvad leh Sthayitva Evum Sujalaam Abhiyan kalpui dan tur chungchangte sawiho a ni a. October ni 2, 2021 hian fai hnatlang Champhai, Khawbung leh Hnahlanah te District Water and Sanitation Mission member leh Official dangte insemdarha neihpui nise tih a ni bawk.

He hunah hian Pu Z.D. Dengthuama, EE, PHED & Member Secretary, District Water & Sanitation Mission bakah member dangte; SE PHED, PD DRDA, DFO, CMO, DEO, DAO, DLAO, DIPRO, EE, I&WRD leh Official dangte an tel a ni.