332/2022-2023
Champhai, the 28th April, 2022: India ram zalenna kum 75 na tlin lawmna Azadi Ka Amrit Mahotsav (AKAM) kaltlangin Mizoram Sawrkar Planning & Programme Implementation Department leh DC Office Champhai-te tangkawp buatsaihin vawiin khan Champhai khawpui huamchhunga Village Council 19 ah te 'Azadi Ka Amrit Mahotsav Mipui huapzo Faina Hnatlang Runpui' neih a ni.

Faina hnatlang runpui hi India ramin zalenna a neih kum 75 tlin lawmna puala mipui tam zawkte an tel theihna tur tinzawna siam a ni a. A hawnna hun Champhai Kahrawt Field-a neih chu District Bawrhsap Pu James Lalrinchhana chuan telpuiin faina hnatlang runpui chu a hawng a ni.

Hawnna hun Kahrawt Veng VCP Pu F. Laldingliana kaihhruaiah District Bawrhsap Pu James Lalrinchhana chuan thu sawiin, India ram zalenna kum 75 tlin lawmna Azadi Ka Amrit Mahotsav, Zalenna Kutpui chu March ni 12,2021 atanga hman tan, kumin August ni 15 a kar 75 na tling tur a nih thu leh, a lawmna chu nakum 2023 August ni 15 thlenga kalpui tura ruahman a nih thu a sawi a. Zalenna ropui zia leh hlut zia tarlang tur hawi zawnga a lawmna program hrang hrang buatsaih a nih thu sawiin, India ram hmun dangahte pawh a lawmna program hrang hrangte huaihawt chhoh mek zel a ni, a ti a. Zalenna lawm chuan chakna leh theihna keimahni theuha inphumte haichhuakin hmasawn leh him nana hmang chhuak thei tura min fuih thartu nise a duhawm hle a ni tiin, kalkhawmte chu hemi kawnga thangharh deuh deuh turin a chah a ni.

Ram hmasawnna kawng zawh mek zel karah ruihhloin Champhai District a tibuai mek chu pawi a tih thu Bawrhsap chuan sawiin, mipuite chu mutmawh hnarmawha hmanga thalaite nun tichhe mektu ruihhlo leh a kaihhnawih hrang hrangte, dan lova thil ti thinte do kawnga theihtawp chhuah tur leh, thuneitute tha taka tawiawm thin turin a chah a. Mahni hmunhma theuhte tifaia veng hrang hrangte an hnatlang mup mup chu hmuh nuam a tih thu sawiin, kan taksa, in leh a velte mai bakah kan rilru leh ngaihtuahnate chenin fai vek se hmasawnna kawng dik leh tlo kan nei thei dawn a ni, a ti a. A tha zawnga hmasawnna zawh kawnga rualawhna leh thuawihna nei tur leh, ram leh hnam dinchhuah nana inpe thar tura mipuite sawmin faina hnatlang runpui chu a hawng a ni.

Thusawitu dang Swach Bharat Mission Local Ambassador Pu P. Lalhmingliana, Principal, Govt. Champhai College chuan ram changkang apiangin faina an ngaihpawimawh thu leh, fai chu changkanna leh hriselna rahbi pawimawh tak a nih thu a sawi a. Fai duhna thinlung put hmasak phawt loh chuan faina tluantling a neih theih lo a ni tiin, faina chu a zahawm a, inzirtirna hmanga neih theih a ni, a ti a. Khawlaia bawlhhlawh paih mai mai te, ran tlat chhuah tir leh kawngpui dunga lirthei sil mai thinte bansan a hun tawh takzet thu a sawi bawk.

Azadi Ka Amrit Mahotsav mipui huapzo faina hnatlang runpui hawnna neih zawh hnu hian District Bawrhsap Pu James Lalrinchhana leh DUDO Champhai Pi R. Lalnunkimi te chuan veng hrang hranga hnatlangte a remchan dan ang zelin an tlawh kual a. Vawiin faina hnatlang runpui kaltlang hian Champhai Town Area huamchhunga Village Council 19 ahte mipui huapzo faina hnatlang runpui neih a ni a. Zing lama hnatlang an awm laiin, veng tam zawkte chuan tukthuan ei khamah hnatlang an tan a, veng chhung hmun hrang hrangte insemdarhin an tifai a ni.