331/2022-2023
Aizawl the 28th April, 2022 : Vawiin khan Mizoram Fisheries Technical Service Association (MFTSA) General conference vawi 29-na chu Fisheries Conference Hall, MINECO- ah neih a ni a. Hemi hunah hian Pu K. Lalrinliana, Fisheries Minister chu khuallian niin Fisheries Department Secretary Pu Laldawngliana, MPS chu Khualzahawm a ni bawk. Conference thupui atan hian 'Luidung nungcha humhalh leh hman tangkai' tih hman a ni.

District hrang hrang atangin Fisheries Department-a thawktu Technical mite an kalkhawmna MFTSA Conference-ah hian Khuallian Fisheries Minister Pu K. Lalrinliana chuan luidung nungcha humhalh tih hian sangha mai bakah chengkawl, kaikuang leh thildang humhalh kawnga hmalak a tul thu a sawi a. A kum telin tualto thei leh luidung nungchate an tlem tual tual a, a humhalh kawngah mipui leh sawrkar ten theihtawp chhuah a ngai a, luidung kan humhalhin chhungkaw tam tak eizawnna ngel nghet tak a siam thu a sawi bawk. Khawvelin hun harsa tak a tawh chhoh mek lai hian ei tur kan tlakchhamlohna turin sangha dilah mai nilo, kan ram luidunga nungchate atanga eitur tam zawk tharchhuah kawngah department a thawktute nasa zawka tan la leh zual turin a fuih bawk a ni.

Khualzahawm Pu Laldawngliana chuan department-a thawktute fuihin tun aia nasa zawka luidung humhalh kawngah khawtlang leh YMA te nena tha zawka thawhho dan thiam turin a chah bawk.

Fisheries Departrment report danin luidung nungcha humhalh leh hman tangkai kawngah hian department-in theihtawp chhuahin nghahrah leh nghasen te Govt Fish Seed Farm, Lengpuiah khawi chhin an ni a. Dilah pawh an thang tha hle tih finfiah a ni a. Dapchhuah Branch YMA te nen tangkawpin a no khawi pun a, nghaphusen, nghabual, nghahrah leh leh luidung sangha dang te tui tir tum mek bawk a ni.

Fisheries department hi kum 1960-ah Agriculture Department hnuaiah peng pakhat a ding tan a ni a. September ni 13, 1993 atangin Agriculture department atanga indangin department puitling a lo ni ta a ni. Kum 1984 khan MFTSA hi Fisheries Department thawkte service ngaihtuah leh department hmasawnna tur theihtawpa hma la tur din a ni.
He hunah hian Kum 2022 – 2024 chhunga MFTSA office bearer thlanna, Mizoram Journalist Association (MJA) kaihhruainain neih nghal a ni. Heng mite hi thlanchhuah an ni.
1. Pu K Lalmalsawma
2. Pu PC Lalngaihawma
3. Pu Lalsiamliana
4. Pu Pi Zomuansangi
5. Pi Zonuntluangi
6. Pu K Lalrinmawia