330/2022-2023
Aizawl, the 28th April 2022: Vawiin khan Education Department, Government Aizawl West College(GAWC) in Mizorama Zirna kalpui meka zirna leh zirna kaihnawih thil pawimawh tak tak, zirchiana lehkhabu a buatsaih, “Issues concerning Education in Mizoram” chu Pu TJ Lalnuntluanga, Minister of State, Law & Judicial, etc., Auditorium, GAWC-ah a tlangzarh.

Pu TJ Lalnuntluanga, Minister of State, Law & Judicial, etc., chuan Mizorama zirlaite leh zirtirtute tana tangkai em em tur lehkhabu tha tak Education Department, Government Aizawl West College(GAWC) in tha taka a buatsaih chu lawmawm a tih thu a sawi a. Zirna in a tumah lehkha zir ngawr ngawr, degree neih piahlam thil pawimawh tak tak a awm tih a sawi a ni. New Education Policy te hman tan a ni chho a hei hian zirna kalpui thin dan te tunlai kan khawtlang nun, ram politics, ei leh bar dinhmun leh ram inrelbawlna danglam hre hret bakah technology lo hmasawn chho zel milin zir dan phung leh zirtir dan thar te a rawn siam belh a. He policy tharah hian pawl hniam lama zirtirna kalpui dan te pawh a rawn uluk leh zual a. A tum ber chu India ramah mithiam chhawrtlak, khua leh tui tha tam tak chherchhuah a, India ram chu mi thluak tha tamna ram, “Knowlegde Superpower-ah” siam a ni a ti a. New Education Policy-ah hian pre-school a rawn ngai pawimawh hle a, tin eizawnna tlaka miin lehkha a zir theihna turin vocational training course a rawn ngaipawimawh hle bawk a. Zirlai a lo graduate a nih chuan eizawnna tlak thiamna neih tir a tum a ni a ti.

New Education Policy in a turn ber, kan zirna te tihchangtluna, a system siam thata India hi education hub leh zirna lama superpower a nih rualin hemi hlawhtlinna turah pawimawh tak chu zirtirtute an ni a ti a. Zirtirtu an that chuan institution a tha a, institution a that chuan zirlaite hma khua a en phah thin a ni a ti. Law Minister chuan Hmasawnna/ Change hmachhawn tur hian enge mipui leh kan society inpuahchah lawkna tha tak a neih a ngai a. Thlirna hrang hrang atangin hmasawna tura kan hmachhawpte zirchian a ngai lawk thin a. Chuti lo chuan kan hnam zia rang kal san hian kan changkang vak thei tho bawk a ni tih kan hriat reng a tha a ti.

Lehkhabu Tlangzarh inkhawm hi Dr. Rosangliani, Assoc Prof, GAWC in a kaihruai a. Prof. C. Lalthlengliana, Principal, GAC in thuhmahruai neiin Lehkhabu hawnna inkhawm hi tan a ni a. Lehkha chhunga inziak thlirlawkna huntawi Prof. Benjamin Lalrinsanga, State Nodal Officer, NEP, Directorate of H&TE in a nei a. Pi Lalrosangi, HOD, department of Education, chuan Lawmthu sawiin hun tawp a khar a ni.