No.230/2021-2022 

Hnahthial 22nd April, 2021 : India Sawrkar ruahmanna in August 15, 2022-a India Independence kum 75-na lo thleng tur lawmna programme chu hman mek zel a ni a. He programme hi Azaadi ka Amrut Mahatsav (India Kum 75 Zalenna Hlimawm Kutpui) tih niin, chawlhkar 75 chhung hman tur a ni a, March 12, 2020 atang khan hman tan a ni. 

Mizoram-a he programme kalpui tur hian State Level Committee on Celebration of 75th Anniversary of India's Independence chuan hmalak dan tur a duang a. He Committee in hmalakna tur a duan tihhlawhtlinna atan vawiin Dt. 22.4.2021 (Ningani) hian Govt. Hnahthial College chuan College Auditorium-ah “National Level Seminar on 'Ropuiliani' a buatsaih a. Seminar hi Dr. C. Hmingsangzuala, Assistant Professor, Dept. of Geography in kaihhruai in Pu K. Lalsangluaia, Principal Govt. Hnahthial College in Keynote Address a pe a.

Pi Lalrinkimi, Asst. Professor, Dept of Mizo Seminar Paper, “Lalnu Ropuiliani Chanchin leh British laka a Rilru Put Hmang" tih leh Dr. K. Lalzuimawia, Asst. Professor, Department of History Seminar Paper "Resistance of Ropuiliani to Colonial Rule in Mizoram" tih ngaihthlak leh sawihona neih a ni. Pi Rinchungnungi, Associate Professor, Department of Economics in lawmthu sawina in hun a khar a ni.