No.231/2021-2022 

Dated Khawzawl, the 22nd April, 2021 : Pu PC Lalchunglura, Superintendent of Police, Khawzawl District thuchhuahin a tarlan dan chuan Khawzawl District Police-te chuan tun hnaia  Covid-19 thawh hnihna (second wave) avangte leh dan lova bungraw phurin District chhung an kal tlang thin avangtein hma nasa takin an  la chho zel a ni.

Thuchhuah tarlan dan chuan April Ni 12, 2021 zan khan Covid-19 laka mipuite  himna turin mipuite hnena ngenna leh hriattirna (Public announcement) te neiin aurinna hmangin khawlai fan kual a ni a. Covid-19 Flying Squad-te leh Covid Executive Duty-ten chhun lamah ngawrh taka duty neiin, zan lamah Police Patrolling party ten Khawzawl khaw chhungah duty an nei thin bawk a ni.

Covid-19 laka invenna tura inkaihhruaina dan bawhchhiate lakah hma (action) lak zel niin,14.4.2021 atanga 21.4.2021 inkar chhungin Police duty-ten Covid-19 venna atana inkaihhruaina dan bawhchhia mi 78 te pawisa an chawitir a, fine tlingkhawm hi Rs.8,700/- a ni. Khawzawl Police ten Covid-19 dan bawhchhia an man/fine tir tawh zawng zawng hi nikum 2020 atanga vawiin thlengin mi 2187 leh pawisa chawitir zat Rs 3,74,400/-  a tling tawh a ni.

Heng bakah hian dan lova bungraw phur thinte check a hma lak zel a ni bawk a. March, 2021 chhung khan Foreign Cigarette tum hnih man atangin case 82 man a ni a. Tun hnaiah dan lova Kuhva rah phurte Khawzawl leh a chhehvel-ah engemawzat man an ni a, March, 2021 atanga April Ni 21, 2021 chhung hian tum nga (5) man tawh niin, 20.4.2021 zanah Ngaizawl Road-ah truck 10 man a ni a, 21.4.2021 zanah Neihdawn road-ah truck pali(4) man  a ni bawk. Tun hnaia Kuhva rah phur mante hi Truck/motor 22 leh an kuhva rah phurh avaiin bag 917 man a ni a,  tualchhung rate ah Rs.73,36,000/- man hu vel a ni a, Custom Preventive Force, Champhaiah hlan an ni. Nikumah khan dan lova Kuhva rah phur engemawzat an  man tawh  bawk.

Tun hnaiah DC Khawzawl kaihhruaina leh hmalaknain Sorkar leh NGO/YMA, VC-ten lungrual takin dan lova bungraw phur thin leh Kuhva rah phur thinte lakah hmalak nise tiin a rel a, theihtawp chhuaha hmalak zel tum niin, mipuite pawh dan bawhchhe lo tur leh Sorkar/VC/NGO te hmalakna thlawp tlat turin ngen an ni bawk.

Hripui leng Corona Virus laka  him theihnante, Ran hrileng laka himna turte, dan lova bungraw tawlh, Kuhva, Cigarette, damdawi thalo (drugs) leh ralthuam leh adangte tihtawp a nih theihnan  mipuite tangrual puiah Khawzawl District  Police chuan a sawm a. Dan leh thupek kengkawhtute, NGO/YMA leh VC te hmalaknate thlawp tlat tura mipuite ngen nawn lehin, Covid-19 laka  him  tlan nana Sorkar thupek leh kaihhruainate, Zan curfew-te ngai pawimawh theuh turin a chah nawn leh bawk a ni.