Vawiin khan Secretariat Conference Hall, New Secretariat Complex-ah State Level Screening Committee on Border Area Development Programme (BADP) neih a ni a. Meeting-ah hian Aizawl bakah District hrang hranga BADP lam hotute an tel tha hle.

Addl. Chief Secretary Pu Arvind Ray, IAS kaihhruai vawiin meeting-ah hian Pu Lalhmingthanga, IAS, Secretary, Rural Development Department chuan meeting koh chhan leh BADP hnathawhte a sawifiah a. Chumi hnuah RD Block hrang hranga mawhphurhna latu officer ten kum 2015 - 2016 chhunga an hnathawh tlangpuite report pe in kum 2016 - 2017 chhunga hmalakna tura ruahmanna an siam te an tarlang bawk.

Border Area Development Programme (BADP) hi ramri depa cheng mipuite tih hmasawnna tura sawrkar laipui Programme pawimawh tak leh hlu tak a niin he Programme hnuaia hnathawhna tur sum te hi sawrkar laipuiin a rawn tum vek a ni. He Programme hnuaiah hian Agriculture link road laih te, Community Hall sak te, School building, Anganwadi Centre building leh Health Sub-Centre building sak te, Khelmual siam te leh hna hrang hrang thawh thin a ni bawk. He Programme hi Mizoram ah chuan Rural Development Department in a enkawl a, District Level Committee leh State Level Committee an awm a. State Level Committee hi State Level Screening Committee (SLSC) tih a ni a, chutah chuan Chief Secretary hi Chairman a ni. SLSC hian District Level Committee atanga hnathawh tur chi hrang hrang an rawn rawt te chu a lo endik a, hnathawh tura a pawmte chu sawrkar laipui Ministry of Home Affairs-ah sanction turin a thawn thin a ni.

BADP hnuaia hmasawnna hnathawhna tur in Ministry of Home Affairs chuan kum liam ta 2015 - 2016 atan Rs. nuai 3862.00 a rawn pe a. Hetah hian Rs. nuai 3812.00 hman ni tawhin a Rs. nuai 50 chu BADP hnuaia hnathawhte enzui tura Monitoring Cell hnathawh nan hman tur a ni.

SLSC hi March/April thla ah kumtin a thu thin a, kum 2016-17 chhunga hnathawh tura rawtte endik turin vawiin khan an thukhawm leh ta a ni.