Ramri hrula khuate tihchangkanna tur ngaihtuahin vawiin khan State Level Screening Committee(SLSC) on Border Area Development Programme (BADP) chu Pu Vanhela Pachuau, Chief Secretary leh Chairman SLSC on BADP ni bawk hovin sawrkar mipawimawhte Chief Secretary Conference Hall, New Secretariat Complex-ah an thukhawm.

Rural Development (RD) Block sawmparuk (16) ten BADP sum an hman tangkai dan tur Annual Action Plan an siam chu BDO ten anmahni bial chhunga an hmalak dan tur uluk zawkin lo zirchiang leh sela, RD Director hovin thlir nawn leh se tia BADP Screening Committee in May ni 2, 2012 a thu a lo dah tawh angin tha takin hma lak a ni a. BADP hnuaia Ministry of Home Affairs in Mizoram tan a dah hman dan tur Annual Action Plan Border Area Development Programme 2012-2013 chu vawiin Meeting-ah hian pawm a ni.

BADP Screening Committee Chairman Pu Vanhela Pachuau chuan quality control a pawimawhzia sawiin BDO ten an bial theuh ah uluk taka vila, chhawrtlak leh rintlak hna thawk turin a chah a. Contractor emaw heng hnathawk tura an chhawr te reng reng, beisei anga tha a hna an thawk lo a nih chuan sum pekchhuah kawngah pawh harsatna siam ve mai turin a hrilh a, sum a thlawnin a riral tur a ni lo, a ti.

Vawiin meeting-ah hian 23 Sector Assam Rifles DIG Brig. SP Rawat chuan ramri hrul khua te tana nizung chakna hmanga inchhung tihenna tur rawtna a neih a sawi chhuak a. Sum tlemte senga eng pek theihna tur siamtu Tata Energy Research Institute hotute thil awmdan a hmuna rawn thlithlai tura sawm chhuah a inbeisei dan te meeting-ah hian a tarlang a, bawhzuipui pawh vawiin thukhawm hian an remti a ni.

Meeting-ah hian Additional Chief Secretary Pi L Tochhawng, State Planning Board Member Secretary Pu P.L. Thanga bakah Secretaries, RD Department mi pawimawh bakah BDO engemawzat an tel a. BSF leh Assam Rifles aiawh te pawh an tel bawk.