A biala cham mek Parliamentary secretary Pu S.Laldingliana chuan vawiin khan Serkawn Baptist Higher secondary school Annual Sport vawi 52 na chu Lunglawn khelmual-ah Khuallian niin a hawng.

Pu S. Laldingliana chuan Annual Sport hawnna ah hian puanzar pawt pharhin parade contingents te chibai a chhang let a. Thu sawiin Pu S. Laldingliana chuan a lehkha lo zir tawhna school ngeiin Annual Sports vawi 52 na hial an thleng thei chu lawmawm a tih thu a sawi a. Zirna leh Infiamna hi thil inkawp tlat, mihring nun atana pawh then theih loh a ni. Chuvangin ruihhlo laka fihlim a, hmalam pan zel tura tan la turin a duh thu a sawi a. Zirna leh Infiamna hmanga Zoram ti hmingthatu ni zel turin duhsakna a hlan a ni. Mizoram Sawrkar in thalaite talent phochhuahna atana Catch Them Young Policy a kalpui dan te, Sports Discipline hrang hranga hma a lak dan te tarlang telin Thalaite tan he thil hi chona ropui tak a tling a, chumi chu hmang thiam tura zirlaite chu tan la turin a fuih a ni.

Serkawn Baptist HSS hi Kum 1958 a din niin tunah hian Zirtirtu mi 55 awmin zirlai naupang 1400 chuang an awm a ni. He Annual Sport-ah hian Indoor leh Outdoor games bakah Individual Items chi hrang hrang te neih a ni ang a. Tum lawk dan chuan Annual Sport hian June ni 1 (khat) thleng a awh ang.