Ramri-a chengte tihhmasawnna tura hmalakna BADP hnuaia State Level Screening Committee chu nimin chawhma dar 11:00 khan Secretariat Conference Hall ah chairman Pi L.Tochhong, Chief Secretary hovin an thukhawm a, kum 2014-2015 chhunga hmalak dan tur te an rel.

Meeting ah hian kum kalta 2013-2014 tana hman tur sum ruahman hmuh tlai a nih avanga hna thawh tan mek a nih chauh dan te sawichhuah a ni a, Ministry of Home Affairs-in BADP hnuaia hnathawh nan kum 2014-2015 chhung atan sum Rs 40,17,00,000 /- a pawm fel tawh chu Mizoram-a Block 16 te chanpual tur bithliah felin Block tina hmalak dan tur (Action Plan) te ngun takin an thlir ho a, Block tin atanga Block Development Committee ten ruahmanna an duan te chu a tul anga siamtha-in pawm a ni. Indo-Bangladesh Border Fencing (IBBF)-in a khawih khuaa chengte chhawmdawl nana Ministry of Home Affairs-in kum 2013-2014 ah Rs 1429.94 lakhs a rawn pek belh hmanga hmalak dan tur ruahmanna MHA-in a pawm tawh chu Meeting chuan a pawm bawk a, District leh Block hrang hranga hna la thawh zawh loh bawhzui dan tur leh hna kal lai mek te zawh fel hun te bithliah fel a ni bawk.

Chief Secretary chuan mipui chawikan nana sum tam tak lo kal te chu hlawk tak leh dik taka hman a nih theih nan a enkawltu leh mawhphurtu te chu uluk taka vil leh enkawl hna thawk thin turin a chah a, department hrang hrang ten hmun khata an hmalakna te a inbukthuah loh nan fimkhur turin a fuih bawk.

Meeting-ah hian  R.D. Commissioner & Secretary Pu Lalrinliana Fanai bakah Health & Family Welfare Principal Secretary Pu R.L.Rinawma, PWD Principal Secretary Pu Lalramthanga,  PHE Secretary Pu Lianchungnunga, Sericulture Secretary Pi C.Zothankhumi leh District hrang hrang hotu te, BDO leh department kaihhnawih hotu te an tel a ni.