“Wine Vendor-te hnena permit pek theih loh chungchang “ thu chu hetiang zawk hi a ni tih Excise & Narcotics Department chuan a tarlang :- Mizoram Excise & Narcotics Department-in Wine Vendor permit a pekte zing atang hian kuminah Permit/Challan siam tum an tlem hle a. Mizoram pumah tun hnai hian vendor 6 chiahin permit/challan an siam a, Aizawl bikah chuan Vendor 29 atangin 17 chiahin kumin (2014) hian an license an renew a ni. Vendor te hnen atanga permit/challan siam dilna a awm miau si loh chuan Excise & Narcotics Department hian an hnenah a pe ngawt thei lo a ni. Tin, Vendor-te hnen atanga hriat dan chuan wine demand hi a hniamin a hralh pawh a kal ta lo deuhvin kumin January thlaa wine an lak pawh hralh zawh lohvin an la dahtha nual a ni.

Vendor-te hnen atanga Permit/Challan siam dilna lo lut ang ang chu Excise & Narcotics Department hian a pe nghal zel bawk. Hetianga Winery leh Wine Vendor-te Department-in a ngaihthah deuh niawma thuthang awm chu Excise & Narcotics Department chuan pawi a ti hle a, Winery leh Vendor-te hmakhua chu a ngai pawimawh hle zawk a ni. Tin, hemi kawnga thuchiang hre duh chuan Department hotute zawhfiah phawt zel nise tih chu Department duhdan a ni e.