Tawipui Group YMA Football Tournament Final chu ni 24.5.2014 (Inrinni) khan Mamte khelmualah zawh fel a ni a, Tournament kharna inkhawmah HPC Lunglei Vice Chairman Pu S.Laldingliana chu Khuallian a ni.

Khuallian chuan football tournament buatsaih a nih theih nana theihtawp chhuahtu Lunglei District Sports Council Chairman Pu K.Lalawmpuia leh khawtlang hruaitute hmalakna chungah lawmthu a sawi a. Sorkarin thalaite hmasawnna tur a ngaihtuah nasa hle a; Aizawl, Lunglei leh Champhai-ah te football khelna tur 'artificial turf' phah a ni tawh a, hmun dangah pawh phah zel tum a ni a. Hetianga thalaite hmangaihtu Chief Minister Mizoram-in a nei hi thalaite vanneihna a ni, a ti. Khawvel pumhuapa infiammite fuankhawmna thin Olympics 2016 awm turah pawh Mizo hmel kan hmuh ngei theihna turin sawrkar chuan theihtawpin tan a la zel a, "thalaite tan khawvel thar kan siam ang" tia inthlan dawna kan auhla kha a tak a chang mek a ni, a ti. Mamte khelmual chu mi 7 chauha football khel theihna a nih avangin mual laih tur tha a awm chuan Mamte mipui tan sawrkar chuan mual puitling laihsak a tum thu a sawi bawk.

Tawipui Group YMA Football Tournament Final-ah hian Thingfalin 3-2 a Mamte hnehin an Champion a, Champion hian Khuallian Pu S.Laldingliana kut atangin tangka fai Rs.5,000 bakah trophy leh medal an dawng a ni. Pahnihna hian Rs.3,000 bakah Trophy leh Medal an dawng bawk. Lawmman dawng dangte chu - Fair Play Award : Thlengang, Top Scorer : MS Dawngliana (Mamte), Best Player : Ramengmawia (Mamte), Best Keeper : Lalnunsanga (Tuipui V) te an ni. Khuallian chuan Team chhuak zawng zawng 12 hnenah Jersey a pe vek a; Champion hnenah Football 3 leh pahnihna hnenah Football 2 a pe bawk a ni.