Bairabi bul Zophai ramah Pu V.L. Hminga ram enkawltu Pu Zairemsiama phalna in Assam retailer Said Ali Assam-in in a sak chu Kolasib DC hmalakna in March ni 10 (Ningani) khan a hmunah Kolasib SDC pahnih Pu Lalhmingliana leh Pu Lalngaihawma ten thil awmdan an en hnuin, he in hi thiah a ni. Heng hma lakna leh thu awmdante hi Kolasib DC Pu H. Lalengmawia chuan phone-in Home Minister Pu R. Lalzirliana a hrilh nghal a, Home Minister chuan he hmalakna hi tha a tih thu DC hi a hrilh a ni.

Kolasib DC Pu H. Lalengmawia IAS chuan helai in sak hi tunhnai thla thum kalta vel khan Pu V. L Hminga ram enkawltu Pu Zairemsiamna’n Assam retailer Said Ali sak phalna a pek hnuah, Said Ali hian dawrte atan sa a ni a. Mahse helai ram hi Assam leh Mizoramin status quo kan kalpui mek chhung niin tu state mahin eng mah kutthlakna neih loh remtihnaah awmsa tawh bawhchhiatnaah ngaiin he in hi thiah a nih thu a sawi a. Assam mi leh sa in helai a in an sa chu a dik lo a, nakin zelah harsatna a punlun loh nan leh ramri depa boruak muanawm lo a thlen loh nan, he in hi thiah a ni a. He in hi kan thiah loh chuan Assam lamin an ram chinah an ngaihbel thei a chuvangin he in hi kan vaw thiat a ni, a ti.  He thil thleng avang hian helai hmunah boruak duhawm lo leh muanawm lo engmah a thleng lova, uluk takin Administration leh Police ten kan enzui reng a ni, a ti bawk.