Nizan dar 8 : 30 pm vel khan Bairabi Rel station bulah kangmei a chhuak a, chhungkaw 12 In luahlai leh Dawr atana luah In 5 te chu bungraw chuh hman lohvin a kangral vek a. In dang 3 chu a kan nasat hma a thiah a ni. Kangmei chhuah lai hi khaw thatlai a ni a, thi leh hliam  an awm lo.

Kangmei chhuahna hmun hi tukin zing khan Kolasib bialtu MLA Pu PC. Zoram Sangliana chuan a hmunah a tlawh a. Chhiat tawkte chu a tawrhpui zia leh a tul apiangah nunphung pangngaia an luanluh theih nana a tih theih ang ang te a tih dawn thu a hrilh a ni. Mahni In luah lai kang ral vek chhungkaw 12 te chu bul an tan thar lehna turin Inchung chih tur Rangva 4 bundles theuh a pe nghal a. Kangmei chhuaka vanduaina tawk ta chhungkaw 20 te hnenah tanpuina pawisa Rs.1,500 theuhvin a pe a, tlawmngaia chhawmdawl hna thawka hnatlang te thingpui lumna turin Rs. 5,000 a pe bawk a ni.

Bairabi a kangmei chhuahna chhan hi In pakhat Pu Vanlalthlana In atanga Current put (short circuit) vang nia ngaih a ni a. Bungraw chhe tamtak zingah Kolasib - Bairabi Sumo tlan lai Pu Vanlalthlana ta chu a kang chhe hneh hle a. Vawk 3, Kel 1, leh Ui pakhat an kanhlum bakah eirawngbawlna Gas bur 7 a kangral bawk a. Bungraw kang ral zawng zawng hi Kolasib DC office a thawktute chhut danin cheng nuai 66 hu vel a ni.

Bairabi chhiat tawhna hmunah hian vawiin lam khan khaw thenawm atangin hnatlang turin mi tlawmngai thahnem tak an thawkchhuak a.Mimal leh tlawmngai pawl YMA, VC leh MHIP atang tein tanpuina sum   thahnem tak a lut a, vawiin chawhma thleng khan Rs. 23,810/- a tling hman a ni. Suarhliap, Chuhvel, Saikhawthlir, Meidum, Pangbalkawn leh Kolasib atangin mi tlawmngaite hian Bairabi khawtlang hi an pui a ni.

Vawiin vek chawhnu lam khan Kolasib DC Pi Niharika Rai, IAS leh SP Pu Madhur Verma te chuan chhiat tawhna hmun hi an tlawh a, Pi Rai chuan a tul anga bungraw hlu tak hlohtute chu chhawmdawl an nih tur thu a sawi a ni.