3759/2024-2025

Kolasib, Dated 10th January, 2025 :  Vawiin chawhnu dar 2:00 khan Kolasib DC Conference Hall-ah Mizoram PWD hnuaia Bairabi khawchhunga a Double-Lane kawng siam mek chungchangah Kolasib Deputy Commissioner Pu Robert C. Lalhmangaiha hovin thurel ngaite relin thutkhawmna neih a ni.

Bairabi khawchhunga a National Highway 154 kaltlang chu Double-Lane kawng ni tura siam mek a ni a. He Double-Lane kawng siam chungchangah hian hmalakna kal mekte chu vawiina thutkhawmna ah hian Kolasib DC hovin thlirhona neih a ni a. Kawngpui siam avanga harsatna awm thei hrang hrangte sutkian dan tur pawh ngaihtuah niin; chung zingah chuan vantlang tui lakna khaihlak lo zawnga kawngpui siam hna thawh dan turte, leivung paihna hmun turte, vantlang mipuite nunphung ti buai lo zawng leh mipui hriselna ngaihtuah chunga kawng siam dan turte ngaihtuah hona neih a ni a. Kawng siam chungchanga mimal ram neitute’n harsatna an neihte pawh a rang lama chinfel dan tur sawiho a ni bawk. Heng hmalakna hrang hrangte hi chak zawka kalpui a nih theih nan khawtlang mipuite hnen a puanzar dan tur pawh rel nghal a ni.

Bairabi khawchhunga National Highway Double-Lane kawng siam hna hi Mizoram PWD hnuaia NIDHI Creative Infrastructure Pvt. Ltd. Company-te siam a ni a. Harsatna lian a awm loh chuan kumin kum chanve chhungin Bairabi khawchhunga Double-Lane kawng siam hna hi NIDHI Company-te hian zawh hman an in beisei a ni.

He thutkhawmna ah hian  Pu Robert C. Lalhmangaiha, Kolasib DC,  Pi Josephine Zonunsangi, SDO(Civil) Bairabi & DUDO, Pu R. Lalduhthlanga, Sr. EE, PWD NHD-III,  Pu Lalthanzuala, Sub-Deputy Commissioner Pu Amit Prasad, NIDHI Project Manager  PHED JE (Junior Engineer) Pu James K. Lalbiakliana leh Pu H. Lalrinawmate bakah  Bairabi Village Council North leh South leh Bairabi Joint YMA President-te an tel a ni.