No.3409/2021-2022

Aizawl 15th December 2021: Railways Minister Pu Ashwini Vaishnaw chuan Bairabi atanga Sairang thleng relkawng phah hna kal mek chu thawh zawh hun tur tak sawi theih ni lo mahse a chak thei ang bera thawh a ni ang tiin vawiin December ni 15, 2021 khan Lok Sabha-ah Pu C. Lalrosanga a hrilh.

He Bairabi atanga Sairang relkawng chungchanga Mizoram MP Pu C. Lalrosanga zawhna chhangin Pu Vaishnav chuan Kilometre 51.38 a thui he relkawng siam hna hi cheng vaibelchhe 6527 senna tur ni a chhut a ni a, cheng vaibelchhe 4343 sen a ni tawh a, kum 2021-22 chhung atan cheng vaibelchhe 1036 ruahman a ni a ti. He relkawngah hian lei lian dawh tur 55 a awm a, lei tê 87 dawh tur a awm bawk tih sawiin Union Minister chuan leiverh 32, a vaia a sei zawng, Km 12.65 a awm dawn bawk a ni tih Pu C. Lalrosanga chu a hrilh bawk.

Zawhbelhna chhangin Railways Minister chuan Bairabi atanga Mizoram chhimlam thlenga relkawng siam rawt chungchangah ama office-a sawipuiah Pu Rosanga chu a sawm a. A hnua zawhna dang chhangin Pu Vaishnaw chuan Assam-a Karimganj District chhung ami Dullavcherra atanga Mizorama Zamuang thleng, Km 30 vela thui tur relkawng siam rawt chungchangah amah sawipui turin hemi chungchang zawttu Karimganj bial MP Pu Kripanath Mallah chu a sawm bawk.

Vawiin Lok Sabha zawhna huna eptu lam member-ten Lakhimpur Kheri thil thleng chungchanga an thil ngiat an auchhuahpui avangin Mizoram leh a chhehvel relkawng chungchang zawhna leh chhanna hun a khaihlak deuh hial a. House thutkhawmna pawh zawhna leh chhanna hun hmang zo lovin darkar thum vel lai chawlhsan (adjourn) a ni.