1571/2026-2027

Dated Serchhip, the 30^th July 2026: Vawiin khan Serchhip District-a sawrkar sum (loan) rul tha lote’n an rulh that theih dan tur leh Serchhip District dinhmun sawi hona DC Meeting hall-ah neih a ni a, Additional Deputy Commissioner Pi Dorothy Muansang-i’n hovin Serchhip District-a Bank Branch hrang hranga hotute an kalkhawm a ni.

Meeting-ah hian sawrkar sum puka, rul tha leh duh lote chungthu (Bakijai Case) chinfel dan tha zawk a awm theih nana hmalak zui dan tur hrang hrang te, Bank leh District Administration (DC Office) leh Police Department-te nena thawh hona tha zawk siam dan tur te, case report dan felfai leh awlsam zawk neih theih dan tur te, loan rulh that loh kawnga harsatna hrang hrang awm thinte sawi ho niin, loan rul tha lote – notice vawi hnih pek hnu pawha la ngaihsak tha lote chu an chungah khauh zawka hma lakzui dan turte rel a ni. Meeting-ah hian Bakijai Case te chak zawka chin fel a nih theih nan, Serchhip-ah chauh ni lo, Thenzawl, N. Vanlaiphai leh E. Lungdar –ahte pawh Certificate Officer dah belh an nih theih nan hma lak mek a nih thu sawi lan a ni bawk.

Bank lama thawktu indaih loh thu te, Agriculture loan leh sawrkar scheme tam zawkah loan dahkham ngai lo thinin, ba inthin a tih harsat phah deuh nia hriat thu te, Hearing nei tura kal tha duh lo (absent) an awm thinte chu harsatna langsar zual zingah sawi lan niin, heng harsatna hrang hrangte hi chak zawka chinfel a nih theih dan turte vawiin meeting-ah hian rel a ni.