1572/2026-2027

Lawngtlai, 30th July 2026: Special Intensive Revision (SIR) 2026 kalpui mekah vawiin khan Pu K. Lalthawmmawia, IAS, Electoral Roll Observer for Lawngtlai District leh Commissioner & Secretary, School Education and Sports & Youth Services ni bawk hovin DC Conference Hall- ah thutkhawm  a ni a. SIR 2026  kalpui dan thlirletna  leh hmalak zel dan tur sawihona neih a ni a, Adviser to Chief Minister leh Lawngtlai East bialtu nibawk MLA Dr. Lorrain Lalpekliana Chinzah chuan a telpui.

Pu K. Lalthawmmawia chuan kalkhawmte chibai bukin, Electoral Roll- felfai leh rintlak nei turin Election Commission of India (ECI) chuan theihtawp a chhuah thin a ti a. Summary Revision- kum tina kalpui thin a ni a, Electoral Roll pumpui siamthatna  'Special Intensive Revision' neih thin nibawkin  a hnuhnung ber chu kum 2005 khan  neih a ni, a ti. SIR kalpui a nih chhan ber chu  Vote nei thei zawng zawng an hming a tel vek theih nan te,  Hming leh address dik lo siamthat nan te, E/ Roll dik leh thianghlim siam tura paih ngai paih te, Electoral Roll- dik leh fel fai hmanga  Election rintlak leh thianghlim a awm theih nan te a ni, a ti.

Electoral Roll Observer chuan Hearing neih mek a nih angin Lawngtlai District- bikah fimkhur zual a tul hle a ti a. Insawifiah ngai zingah India khua leh tui dik takte E/Roll - a an luh a pawimawh rualin, hming chuang theilote an chuan palh a hlauhawm hle a, diktaka Hearing kalpui a nih theih nan theihtawp chhuah turin Election Official- te a  chah a.Electoral Roll - felfai leh thianghlim nei turin Tlawmngai Pawl, Kohhran, Chanchinbu mite,  Political Party leh Lawngtlai mipuite an pawimawh hle tih tarlangin, thahnemngai taka ERO, AERO leh BLO - te lo tawiawm turin a sawm a. Pu K. Lalthawmmawia chuan SIR 2026 tha taka kalpui tura Lawngtlai DEO hmalaknaa 'Village Level Standing Committee' din a ni chu chin dan tha leh entawntlak tak a nih thu a tarlang bawk.

Dr. Lorrain Lalpekliana Chinzah chuan SIR 2026 kalpui mekah Election Official- te an hah hle tiin, an inpekna leh thawhrimna fakawm a tih thu a sawi a. Electoral Roll - dik leh felfai a awm theih nan  NGOs, MJA, Kohhran leh Political Party- te thahnemngai taka Election Official- te lo tawiawm tlat turin a sawm a ni.

Vawiin hun hmanna hi District Election Officer Pu Donny Lalruatsanga chuan kaihruaiin, Election Officer Pu Collin Hlychho chuan SIR 2026 kalpui dan tlangpui, hnathawh tawhte bakah hmachhawp awm ang angte tarlanna a nei a. Thutkhawmah hian EROs, AEROs, BLOs, Political Party, NGOs, President, VC Association leh MJA Lawngtlai te an tel thei a ni. Zawhna leh chhanna hun hlawk tak hman niin, SIR 2026 tha taka kalpui chhunzawm zel turin mahni zawn theuhah hmalak ni se, thahnemngai taka thawhho zel ni bawk  se an ti a ni.

Lawngtlai District- ah hian Assembly Constituency pathum;  36- Tuichawng ST, 37- Lawngtlai West ST leh 38- Lawngtlai East ST -  te a awm a ni.