1573/2026-2027 

Dated Aizawl, the 30th July,2026 : Vawiin khan SIRD&PR Conference Hall-ah RD&AD Minister Prof. Lalnilawma’n State leh District official-te tan ni hnih awh tur VB-G RAM G chungchanga training buatsaih hawnna hun a hmanpui a. He training programme hi NIRD&PR Hyderabad leh RD&AD Mizoram te tangkawpa buatsaih a ni.

Minister chuan VB-G RAM G chu MGNREGA hming thlakna leka ngai lovin Mizoram hmun kilkhawrberte hmasawnna hmanrua anga ngai turin training tura lo kalte chu a fuih a, ‘recommitment’ (inhlanthar lehna) nen hna thawk turin a fuih bawk a ni.

Minister chuan VB-G RAM G-ah chuan VB (Viksit Bharat) lai chu a pawimawh a tih thu sawiin, gram panchayat-te tel lovin Mizoram leh India chuan hma a sawn thei lo a ti a. Chief Minister pawhin a lo sawi tawh thin angin Mizoramin 2047-ah chuan India ram GDP-ah 1% tal thawh ve a tum pawh gram panchayat level atanga kan thawhho chuan kan tih theih ngei a rin thu a sawi bawk.

Minister chuan VB-G RAM G hnuaia priority area hrang hrang - water security, core rural infrastructure, leh livelihood related infrastructure te chu an nihna tak pawk chhuak zo tura hnathawh a nih theih nan training tura lo kal te chu a sawm a, training tha leh hlawkthlak tak an neih theih nan duhsakna a hlan bawk a ni.

He training programme-ah hian NIRD&PR Hyderabad atangin Dr. B. Suresh Babu (Associate Professor & Head) leh Dr. GVK Lohidas (Assistant Professor) te an tel a. Training hawnna programme hi SIRD&PR Director Pu R. Lalremsanga’n a kaihruai a, Course Coordinator Dr. C. Lalthlansanga chuan report tawi a pe a,  Associate Professor Dr. Khawlsiamthanga Khawlhring chuan lawmthu sawiin hun a khar a ni.