4673/2025-2026

March ni 3, 2026: Vawiin khan Mizoram AYUSH Doctors Association (MADA) chuan Baktawng khua-ah a thlawna hriselna inentirna (Free Medical Clinic) a buatsaih. Baktawng leh a chhehvel khuaa hriselna lama harsatna nei mi 200 vel zet an inentir a ni.

He Free Clinic ah hian AYUSH doctor 25 leh State Medicinal Plants Board (SMPB) leh MSACS aṭangin mi engemawzat an thawkchhuak a. Mipui hriselna an enfiah bakah a thlawnin damdawi an sem nghal a, thisen test chi hrang hrang a thlawn leh man tlawm zawkin damlo mamawh te tan tihsak bawk a ni.

Baktawng Village Council-in Free clinic buatsaih tute a lo dawngsawng a ni. Inentir hun hawn hma hian hriselna kawnga mipuite inzirtirna hun hman niin ramhmul damdawi chungchang zirtirna neih a ni bawk.

Mizoram AYUSH Doctors Association chuan hetiang ang mipui tana rawngbawlna hi hmun hla zawkahte pawh chhunzawm zel an tum thu an sawi a, Mizoram mipuite hriselna kawngah theihtawp chhuah zel an tum thu an tarlang a ni.