4672/2025-2026
Dated Aizawl, the 3rd March, 2026: Vawiin khan Secretariat Conference Hall, MINECO-ah Mizorama Agriculture leh Horticulture hmalaknaa Irrigation Support pek a nih theih dan chungchangah Inter-Departmental Coordination Meeting, Pu Lalrothanga, Secretary, Irrigation & Water Resources Department kaihhruaihna hnuaiah neih a ni a. Secretary, Agriculture & Farmers’ Welfare Department; Secretary, Horticulture Department; Chief Scientific Officer, MIRSAC leh department pathum te atangin officer pawimawhte an tel a. Secretary level-a hetianga inrawnkhawmna hi Mizoramah a vawi khatna nia hriat a ni.
Agriculture & Farmers’ Welfare Department leh Horticulture Department chuan Cluster-based Development leh Crop Planning lamah hma an sawn mek a. Hemi hmalakna tihchak nan hian Irrigation Support mumal tak neih a tulzia sawiho a ni a. Loneitute chawikan a, ramin hma a sawn zual zel theih nana department thawhho leh tanho a tulzia tarlan a ni.
He meeting-ah hian Agriculture leh Horticulture Department hmalak tawhna hmuna irrigation mamawhna te, irrigation facility siam tawhte nena tangho a thlai mamawh tawk tui pek theih dan leh hmasawnna kawng dangte sawiho a ni a. Micro-Irrigation, Lift Irrigation, Solar Irrigation, Spring-based System leh Water-use efficiency tihhmasawn dante pawh sawiho a ni.
GIS hmanga Spatial Planning leh Scientific Mapping kalpui theih nan, Mizoram Remote Sensing Applications Centre (MIRSAC) puihna hman theih dan pawh ngaihtuah a ni a. Buh leh bal, thlai tharna kawngah mumal zawka department-te thawhhona hian rah duhawm tak a chhuah zel beisei a ni.
