4671/2025-2026

Dated Aizawl the 3rd March, 2026 : Vawiin khan Ri Hriatna Ni (World Hearing Day) chu Mizoram-ah a vawi 11-na atan Directorate of Hospital & Medical Education Auditorium, MINECO-ah hman a ni a. He hunah hian Pi Vanlaldiki, Commissioner, Persons with Disabilities (PWD), Govt. of Mizoram chu khuallian niin, Dr. R. Lalchhuanawma, Mission Director, National Health Mission chuan hun a kaihhruai a ni.

Dr. Rita Zoramthari, MS ENT, Civil Hospital, Aizawl chuan kumin World Hearing Day thupui ‘From communities to classrooms: hearing care for all children’ (Khawtlang atanga naupangte thlengin: ri hriatna tha nei tura naupangte enkawl) tih hmangin thu sawina hun a nei.

World Hearing Day hi kum 2007 atang khan kum tin hman thin niin, vawiin hi khawvel pum huapa a vawi 19-na a ni a. Geneva Headquarter-in a rel angin he ni hian a tum ber chu ri hriatna thalote harsatna hriatthiam pui tur leh ri hriatna thalo titlem tura mipuite hnena zirtirna zau zawka theh darh a ni a. Hei bakah hian mipuite tana hriattur pawimawh chu beng natna a hma thei ang bera hmuh chhuaha, enkawl hma hian bengngawnna a thlen tur nasa takin a veng thei a ni tih a ni.

WHO-in a zirchianna ah ri hriatna thalo hi kan thil hriatna 5 (sensory organs) zinga piansualna-ah a tam ber a ni a. Tunah hian khawvel pum pui-ah mihring tluklehdingawn 1.5 (1.5 billion) vel hian ri hriatna chaklo an nei a, heng zinga maktaduai 430-te chu an beng a ngawng a, tun ang zela kan kal chho anih chuan kum 2050 ah chuan mihring 10 ah 1 zel hi an beng a ngawng dawna chhut a ni. Hetiang anih avang hian kan beng hi kan enkawl uluka, bengngawnna thlentu hrang hrang lakah kan inven fimkhur a ngai hle a. Beng natna chi hrang hrang bakah damdawi beng ri hriatna chaklo thlen thei lakah te leh ri bengchheng nasa lakah te kan inthiarfihlim a pawimawh hle a ni.

He mi kawnga hma la tur hian National Programme for Prevention and Control of Deafness (NPPCD) chu kum 2014, August thla atang khan Mizoramah pawh National Health Mission hnuaiah din tan a ni a. Kumin FY 2025-2026 (April 2025 – January 2026) thlenga chhinchhiah danin Mizoram chhungah beng lama insawiselna nei mi 31,735 lai en niin beng natna emaw beng ri hriatna thalo nei mi 4,750 hmuhchhuah tawh an ni a, mi 222 chu beng thalo vanga zai an ni tawhbawk. Hei bakah hian mi 1,541 chu bengdar dawng tur leh Speech Therapy tul ang te ti tura refer an ni a.

India ramah tunah hian NPPCD, Mizoram hi hma la tha ber pawl an ni mek a. Hemi kawngah hian RBSK (Rashtriya Bal Swasthya Karyakram), Ephatha Society te, Ephatha Special School for the Deaf and Hard of Hearing, College Veng leh Redeem Garden, Durtlang te thawhpui an ni a. Hei bakah hian NILD - NERC (National Institute for Locomotor Disorder - North Eastern Regional Council), ALIMCO leh AYJNISHD (D), Bhubaneshwar-te nen bengdar sem kawngah hian an thawkho mek bawk a ni. ALIMCO leh NPPCD tangkawp hian Zoram Medical College & Hospital, Falkawnah kumin FY2025-2026 (April - January) chhung khan a mawmawhtu te hnenah bengdar 108 lai semchhuah tawh a ni bawk.