4670/2025-2026

Dated Aizawl, the 3rd March, 2026: Vawiin khan MFM Skill Training Centre, Dawrpui Vengtharah Hulhliap Short Stay Centre chhuakte tana a thlawna Skill Training - Aluminium Fabrication leh Assistant Electrician closing function leh certificate semna hun hman a ni. Tun tumah hian Hulhliap SSC chhuak mi 14-te’n Assistant Electrician zir chhuakin, mi 21-te’n Aluminium Fabrication training an zo a ni.

Dr. R. Lalnunmawii, Joint Director (Rtd.), SW&TA & Member, Task Group on Aftercare, Skill Training & Handholding, Hulhliap-SSC in inkhawm a kaihruai a. Dr. Lalhmuchhuaka, Vice President, Indian Medical Association, Mizoram State Branch & Member, Task Group on Aftercare, Skill Training & Handholding, Hulhliap-SSC-in hunserh hmangin, khawvelah chetsual chang te, kal sual chang te awm mah se engtik lai pawha thil tha tihsak thintu, engkim ti thei Pathian an neih avangin, a kutah innghat a, amah rinchhana kawng zawh thar theuh turin training chhuakte a fuih a ni.

Pu Lalramchuanzela, Executive Director, MFM & Member, Task Group on Aftercare, Skill Training & Handholding, Hulhliap-SSC chuan report pein, tun tumah hian mi 35 hnenah Certificate sem chhuah a ni tih a tarlang a. Assistant Electrician hi January ni 28-a tan niin, Aluminium Fabrication hi February ni 17-a tan a ni a. Trainer-te, Pu Lalremruata (Electrician) leh Pu Malsawmliana (Aluminium Fabrication) te’n zirtirin, an training chhung hian Pu Lalrinmawia leh Pu Lalchhandama te’n Devotion hun an hmanpui thin thu a sawi a. He hunah hian training chhuakte chu taimakna leh teirei peihna an neih phawt chuan Mission Foundation Movement-in Japan rama a thawhpuite chuan Japan ramah Motor khalha thla khata nuai chuang hlawh thei tur thalai za chuang an mamawh thu leh thawn chho tura ngenna an rawn siam te tihlawhtling thei tura mahni invawng a, thahnemngai tak leh taima taka thawk zel turin a sawm a ni.

Pu Lalnunhlua, Additional Secretary, SW&WCD & Convener, Task Group on Aftercare, Skill Training & Handholding, Hulhliap-SSC chuan thu sawiin, duhthlanna hman sual avangin thlan ngai loh, duh loh kawng miin an zawh thin a, chu chuan nun hrehawm leh nuam lo zawk a thlen fo thin a; mahse chu mi karah pawh sawrkarin an inkhai chhuah leh theih nan theih tawp a chhuah a, hun tha buatsaihsak an ni chu tangkai taka hmang a, inthlahdah mai lo tur leh kawng hluia let tawh lo tura sawmin, certificate a sem nghal a ni.

Pi Vanlalhruaii, Member Secretary, Task Group on Aftercare, Skill Training & Handholding, Hulhliap-SSC in inkhawm kharna hun a hmang a ni. Tun thleng hian Hulhliap chhuak mi 118 hnenah certificate sem chhuah tawh a ni.